fbpx

کشمیر میں موجودہ بھارتی مظالم کو مدنظر رکھتے ہو ئےاسلامی ممالک اوربالخصوص عالمی برادری کو اپناکردارادا کر ناچاہئے.سینیٹر حافظ عبدالکریم

ڈیرہ غازی خان (تنویر احمد) مسلم لیگ (ن) کے سینیٹر ڈاکٹر حافظ عبد الکریم نے کہا ہے کہ اسلام ہمیں بھائی چارے کا درس دیتا ہے کشمیر میں موجود ہ بھارتی مظالم کو مدنظر رکھتے ہو ئے اسلامی ممالک اور بالخصوص عالمی برادری کو اپنا کردار ادا کر نا چاہئے پاکستان جنگ نہیں چاہتا لیکن بھارتی ظلم و بربریت کو رکوانے کے لئے تمام سفارتی ذرائع کو استعمال کرنا وقت کا تقاضا ہے میڈیا سے گفتگو کر تے ہو ئے ان کا کہنا تھا کہ اس وقت پاکستان کی شہ رگ کشمیر میں کرب وبلا کی تاریخ دہرائی جارہی ہے مسلسل کرفیو کے باعث اہل کشمیر کی زندگی نہایت تکلیف کی حالت میں ہے سڑکوں اور گلیوں میں خون کی بارش، نوجوانوں کی گرتی لاشیں، بلکتے بچے اور بیمار بوڑھے اور خواتین، انسانی حقوق کی خلاف ورزی اور درندگی عروج پر ہے انہوں نے کہا کہ پاکستان کی ناکام خارجہ پالیسی کی وجہ سے حکمران صرف لفظوں کی جنگ میں مصروف ہیں لیکن کشمیریوں کے حقوق کے لئے اب عملی طور پر اور مؤثراقدامات کی ضرورت ہے تاکہ کشمیریوں کو حق خود ارادیت مل سکے ڈاکٹر حافظ عبد الکریم نے کہا کہ ہم کشمیریوں کی جدوجہد آزادی کی بھرپور حمایت کرتے ہیں او ر بھارتی مظالم کی شدید مذمت کرتے ہیں انہوں نے مقبوضہ کشمیر کی صورتحال پر شدید تشویش کا اظہار کر تے ہو ئے عالمی برادری کے سربراہان سے اپیل کی کہ مقبوضہ کشمیر کی خصوصی حیثیت بحال،مظالم بند اور کرفیو اٹھانے کے لئے اپنا بھر پور کردار ادا کریں۔