کوئٹہ،ٹریفک کے دباؤ کم کرنے کے لیے سٹی نالہ کو پارکنگ بنانے کی تجویز

چیف سیکرٹری بلوچستان مطہر نیاز رانا کی زیر صدارت کوئٹہ ڈویلپمنٹ پیکیج کے حوالے سے اجلاس منعقد ہوا جس میں کوئٹہ ڈویلپمنٹ پیکیج کے تحت شروع کیے گئے ترقیاتی منصوبوں پر پیشرفت کا جائزہ لیا گیا۔ اجلاس میں وزیر اعلیٰ کے پرنسپل سیکرٹری زاہد سلیم، سیکرٹری ٹرانسپورٹ بشیر احمد بنگلزئی، کمشنر کوئٹہ ڈویژن اسفند یار کاکڑ و دیگر حکام نے شرکت کی۔ چیف سیکرٹری نے اجلاس سے خطاب کرتے ہوئے کہا کہ کوئٹہ ڈویلپمنٹ پیکیج شہر میں معاشی سرگرمیوں کو فروغ دینے کے ساتھ ساتھ شہر کی خوبصورتی میں بھی اضافہ کا باعث بنے گا شہر کے روائتی حسن کی بحالی کے اس اہم پروجیکٹ کو مقررہ مدت میں مکمل کرنے کے لیے موثر اقدامات کیے جائیں۔ انہوں نے ترقیاتی منصوبوں پر کام کی رفتار تیز کرنے کی ہدایت کرتے ہوئے کہا کہ منصوبوں کے معیار پر کوئی سمجھوتہ نہیں کیا جائیگا۔اس موقع پر کمشنر کوئٹہ نے ترقیاتی منصوبوں سے متعلق تفصیلی بریفنگ دیتے ہوئے کہا کہ پیکیج میں کوئٹہ شہر کی خوبصورتی کیلئے سڑکوں کی توسیع، اوورفلائی، انڈرپاسز، پارکس، ٹریفک منیجمنٹ اور عوام کی فلاح و بہبود کے منصوبے شامل ہیں۔ چیف سیکرٹری نے کمشنر کو ہدایت کی کہ کوئٹہ شہر میں سرکاری زمینوں کی نشاندھی کرکے عوام کی بہتری کیلئے استعمال میں لائیں۔ اجلاس میں تجویز دی گئی کہ سٹی نالہ کو پارکینگ بنا کر شہر میں ٹریفک کے دباؤ کو کم کیا جا سکتا ہے۔ چیف سیکرٹری نے اجلاس کے شرکاء کو ہدایت کی کہ صوبائی حکومت عوام کی خدمت پر یقین رکھتی ہے اور عوام کی بہتری کیلئے فوری نوعیت کے منصوبے شروع کرینگے۔ انہوں نے کہا کہ سکول کے بچوں کو سفری سہولیات کی فراہمی کیلئے سکولوں کو کوسٹرز فراہم کرینگے۔ انہوں نے کوئٹہ ڈویلپمنٹ پیکیج بارے اجلاس آئند ہفتے منعقد کرنے کی بھی ہدایت کی۔

جواب چھوڑیں

آپ کا ای میل ایڈریس شائع نہیں کیا جائے گا.