اوورسیز پاکستانیوں کے مسائل کو ہنگامی بنیادوں پر حل کرنا ہماری اولین ترجیح ہے ۔ ڈپٹی کمشنر

فیصل آباد(عثمان صادق) ڈپٹی کمشنرعلی شہزادنے کہا ہے کہ ضلع بھر میں مختلف محکموں سے متعلقہ اوورسیز پاکستانیوں کے مقامی مسائل ترجیحی بنیادوں پر حل کرنا ترجیح ہے اس سلسلے میں موصول ہونے والی شکایات کا فوری نوٹس لے کر بلاتاخیر محکمانہ اقدامات کو یقینی بنانے کی واضح ہدایات جاری کی گئی ہیں۔وہ آج اپنے آفس میں ضلعی اوور سیز کمیٹی کے اجلاس کی صدارت کررہے تھے۔ڈپٹی کمشنر اورچیئرپرسن مرزا محمد اصغر نے تارکین وطن کے مختلف محکموں واداروں سے متعلقہ مسائل سن کر موقع پر افسران کو ازالہ کی ہدایات جاری کیں۔اجلاس کے دوران سمندر پار پاکستانیوں کے اراضی پر قبضوں،جائیدادوں کی وارثتی تقسیم،رقوم کی لین دین،جعلی دستاویزات پر فراڈ،تجاوزات،غیر ملکی ویزا میں دھوکہ دہی اور دیگر مسائل پر مشتمل درخواستوں پر اوورسیز پاکستانیوں کا موقف سنتے ہوئے بیشتر شکایات کو موقع پر ہی نمٹا دیا گیا۔ڈپٹی کمشنر نے متعلقہ اسسٹنٹ کمشنرز اور محکموں کو ہدایت کی کہ وہ اوورسیز پاکستانیوں کے مسائل میں دلچسپی لیں اور درکار رپورٹس کی فراہمی میں معمولی سی بھی تاخیر نہیں ہونی چاہیے۔انہوں نے کہا کہ حکومت پنجاب نے اوورسیز پاکستانیوں کے مسائل تیز رفتاری سے حل کرنے کیلئے واضح ہدایات جاری کر رکھی ہیں لہذا درخواست گزار محکمانہ پیش رفت سے مطمئن ہونے چاہئیں۔ڈپٹی کمشنر نے اوورسیز پاکستانیوں اور ان کے نمائندوں سے کہا کہ انہیں درپیش مسائل کے حل کے لئے ضلعی انتظامیہ سنجیدہ اقدامات کر رہی ہے اور متعلقہ محکموں کو میرٹ پر کیسز نمٹانے کے لئے متحرک کیا گیا ہے۔چیئر پرسن نے کہا کہ ملک سے باہر پاکستانی شہری محنت سے وطن کی خدمت کر رہے ہیں جن کی جائیدادوں و خاندانوں کو تحفظ ملنا چاہیئے۔انہوں نے اوورسیز پاکستانیوں کے مسائل کے حل کے سلسلے میں ضلعی انتظامیہ کی جاری کاوشوں کو سراہا۔ایڈیشنل ڈپٹی کمشنر ریونیو فضل ربی،ممبر کمیٹی طلحہ حمید اور دیگر افسران بھی موجود تھے۔