بلوچستان:24 گھنٹوں کے دوران سیلاب سے مزید 15 افراد جاں بحق

کوئٹہ :گزشتہ 24 گھنٹوں کے دوران بلوچستان میں بارش و سیلاب سے مزید 15 افراد لقمہ اجل بن گئےتفصیلات کے مطابق گزشتہ 24 گھنٹوں میں بلوچستان میں 15 مزید ہلاکتوں کی بعد صوبے میں جاں بحق افراد کی تعداد 165 تک پہنچ گئی ہے جب کہ جاں بحق ہونیوالوں میں خواتین و بچوں کی بڑی تعداد شامل ہے۔

پی ڈی ایم اے نے بلوچستان میں بارشوں اور سیلاب سے ہونے والے اب تک کے نقصانات سے متعلق رپورٹ جاری کر دی جس کے مطابق جاں بحق ہونے والوں میں 67 مرد 43 خواتین اور 54 بچے شامل ہیں، یہ اموات بولان، کوئٹہ، ژوب، دکی، خضدار ، کوہلو، کیچ، مستونگ، ہرنائی، قلعہ سیف اللہ اور سبی میں ہوئی۔

پی ڈی ایم اے کی جانب سے جاری کی گئی رپورٹ میں بتایا گیا کہ بارشوں کے دوران حادثات کا شکار ہوکر 74 افراد زخمی ہوئے، زخمیوں میں 47 مرد 11 خواتین اور 16 بچے شامل ہیں جب کہ مجموعی طور پر صوبے بھر میں 13 ہزار 975 مکانات منہدم اور جزوی نقصان پہنچا ہے۔

پی ڈی ایم اے رپورٹ میں کہا گیا کہ بارشوں میں 670 کلو میٹر مشتمل مختلف 6 شاہرائیں شدید متاثر ہوئی ہیں، بارشوں کے باعث مختلف مقامات پر 16 پل ٹوٹ چکے ہیں، بارشوں سے 23 ہزار 13 مال مویشی مارے گئے ہیں۔رپورٹ میں مزید بتایا گیا کہ مجموعی طور پر 1 لاکھ 98 ہزار 461 ایکڑ زمین پر کھڑی فصلیں، سولر پلیٹس، ٹیوب ویلز اور بورنگ کو نقصانات پہنچا ہے۔

واضح رہے کہ بلوچستان میں سیلابی صورتحال کی نگرانی کرنے والا پاکستان آرمی ایوی ایشن کا ہیلی کاپٹر گزشتہ روز لاپتہ ہوگیا تھا اور آج آئی ایس پی آر نے ہیلی کا ملبہ ملنے کی تصدیق کرتے ہوئے بتایا کہ کورکمانڈر 12کور لیفٹیننٹ جنرل سرفراز علی ہیلی کاپٹر حادثے میں شہید ہو گئے، شہداء میں ڈی جی پاکستان کوسٹ گارڈ میجر جنرل امجد بھی شامل ہیں۔