ممتاز حیدر
بھارت میں اوڈیشہ کے جاجپور قصبے میں ایک انتہائی دلخراش واقعہ سامنے آیا ہے، جہاں ایک خاتون کو مبینہ طور پر ایک آٹو رکشہ ڈرائیور نے اغواء کیا، اس کے بعد اجتماعی زیادتی کا نشانہ بنایا گیا اور پھر قاتلانہ حملے میں اسے چاقو کے متعدد وار کر کے نیم مردہ حالت میں چھوڑ دیا گیا۔
پولیس کے مطابق یہ واقعہ 22 اپریل کی رات پیش آیا تھا، لیکن خاتون کی حالت بہتر ہونے پر اتوار کے روز اس نے پولیس میں رپورٹ درج کروائی۔متاثرہ خاتون، جس کی عمر بیس برس ہےکام سے واپسی پر ایک آٹو رکشہ میں سوار ہوئی تھی۔ تاہم، ڈرائیور نے اسے گھر پہنچانے کے بجائے شہر کے نواحی علاقے میں ایک سنسان مقام پر لے جایا۔ پولیس رپورٹ کے مطابق، آٹو رکشہ میں پہلے سے دو افراد موجود تھے اور سنسان مقام پر مزید تین نشے میں دھت افراد ان کا انتظار کر رہے تھے۔پولیس کے مطابق، ملزمان نے خاتون کے دوپٹے سے اس کے ہاتھ باندھ دیے اور اسے اجتماعی زیادتی کا نشانہ بنایا۔ بعد ازاں، انہوں نے چاقو سے اس پر متعدد حملے کیے اور اسے خون میں لت پت حالت میں چھوڑ کر فرار ہو گئے۔خاتون نے اپنی آخری ہمت جمع کر کے ایک راہگیر سے مدد طلب کی، جس نے فوری طور پر اس کے اہل خانہ کو اطلاع دی۔ متاثرہ خاتون کو شدید زخمی حالت میں جاجپور ضلع ہیڈکوارٹر اسپتال منتقل کیا گیا، جہاں اس کی کمر، ہاتھوں اور ہتھیلی پر گہرے زخم پائے گئے۔
پولیس نے واقعہ کی ایف آئی آر درج کر کے تحقیقات شروع کر دی ہیں۔ جاجپور ٹاؤن پولیس اسٹیشن کے انچارج انسپکٹر سرت چندر پاترا کا کہنا ہے کہ "ہم ملزمان کی گرفتاری کے لیے پوری تندہی سے کام کر رہے ہیں اور جلد ہی تمام مجرموں کو قانون کے کٹہرے میں لایا جائے گا۔”اس واقعے نے مقامی آبادی میں شدید خوف و ہراس اور غم و غصے کی لہر دوڑا دی ہے، اور لوگ انصاف کے فوری تقاضے کر رہے ہیں۔
