fbpx

5جولائی 1977کی بغاوت نے دہشت گردی کے بیج بوئے،یہ ملکی تاریخ میں ہمیشہ سیاہ ترین دن کے طور پر یاد کیا جائے گا بلاول بھٹو

چیئرمین پیپلزپارٹی بلاول بھٹو کا کہنا ہے کہ ہم آج بھی پاکستان کی جمہوری بقا کے لیے لڑ رہے ہیں-

باغی ٹی وی : بلاول بھٹو نے 5 جولائی کے‌حوالے سے اپنے بیان میں کہا کہ ذوالفقاربھٹوکواذیتیں دینے والے ملامت جھیلنے کے لیے کوڑے دان میں پڑے ہیں جمہوری اور آمریت پسند قوتوں کے درمیان جنگ آج بھی جاری ہے-

بلاول کا کہنا تھا کہ ذوالفقار بھٹو نے ملک و قوم کے حقوق پر سمجھوتہ نہیں کیااور جان نچھاور کرنے کو ترجیح دی ذوالفقار بھٹو نے کہا تھا کہ اقتدار عوام کو دیا جائے،ورنہ سب کچھ ختم ہو جائے گا ذوالفقار بھٹو کے حامی اور پیروکاروں کو بھی ہر قسم کے تشدد کا نشانہ بنایا گیا-

چیئرمین پیپلزپارٹی نے کہا کہ بینظیر بھٹو نے آمریت کے خلاف بھرپور اور دلیرانہ جدوجہد کی،ذوالفقار بھٹو نے بڑی بہادری کے ساتھ عوام کے حقوق کے لیے جنگ لڑی اورادوراندیش سیاسی تدبر سے عالم اسلام کی قیادت کی-

چیئرمین پیپلزپارٹی بلاول بھٹو نے کہا کہ قائد نے چند سلیکٹڈ افراد تک محدود اقتدار کو چھین کر عوام کو اختیارات منتقل کیے،ذوالفقار بھٹو نے اتفاقِ رائے سے آئین کی منظوری کی سرپرستی کی اور سقوط ڈھاکہ کے بعد ٹکروں میں بٹی ہوئی قوم کو متحد کیا –

بلاول نے کہا کہ 5جولائی 1977کی بغاوت نے دہشت گردی کے بیج بوئے 5جولائی کو ملکی تاریخ میں ہمیشہ سیاہ ترین دن کے طور پر یاد کیا جائے گا-