پاکستان اقلیتوں کے حقوق کی ضامن ریاست ہے، فردوس عاشق اعوان
باغی ٹی وی کی رپورٹ کے مطابق وزیراعظم عمران خان کی مشیر برائے اطلاعات ڈاکٹر فردوس عاشق اعوان نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ عظیم مفکر اور شاعر مشرق علامہ اقبال کے یوم ولادت پر پوری قوم انہیں خراج عقیدت پیش کرتی ہے۔
ڈاکٹر فردوس عاشق اعوان کا مزید کہنا تھا کہ ان کی سوچ مسلمانان برصغیر کو جابرانہ تسلط اور سامراجیت سے نجات کی روشن امید ثابت ہوئی۔ان کا آفاقی کلام اور تصورات ہمارے لیے مشعل راہ ہیں۔وزیراعظم عمران خان حقیقی معنوں میں وہ ریاست بنانے کا عزم رکھتے ہیں جس کا تصور علامہ نے دیا تھا
ایک اور ٹویٹ میں ڈاکٹر فردوس عاشق اعوان کا مزید کہنا تھا کہ پاکستان قائداعظم اور علامہ اقبال کے نظریات وافکار کی روشنی میں اقلیتوں کے حقوق کی ضامن اور احترام کرنے والی ریاست ہے۔آج دربار کرتارپور اور راہداری کا اپنی تعمیر نو کے ساتھ افتتاح بین المذاہب ہم آہنگی ، رواداری اور احترام انسانیت کی عظیم مثال ہے۔
