لاہور:پی ایس ایل کے ٹکٹوں کی قیمت میں کمی ہوگی یا اضافہ ، اہم خبرآگئی اطلاعات کےمطابق پاکستان سپر لیگ ( پی ایس ایل )فائیو کے میچز کے لیے ٹکٹوں کی نئی قیمت مقرر کرنے کے حوالے سے تجویز پیش کی گئی ہے۔
کرکٹ بورڈ کے ذرائع کے مطابق پاکستان کرکٹ بورڈ (پی سی بی )نے پہلی مرتبہ مکمل پی ایس ایل مکمل طور پاکستان میں ہونے کے سبب ٹکٹوں کی کمائی سے زیادہ اسٹیڈیمز بھرنے کو اولین ترجیح قرار دیا ہے۔پی سی بی کے مجوزہ پلان کے مطابق ڈے میچز کے ٹکٹ کے نرخ کم رکھے جائیں گےتاہم نائٹ میچز کے لیے نرخوں میں دو سے تین سو روپے کا اضافہ ہوگا۔
ذرائع کے حوالے سے بتایا گیا ہےکہ اسی طرح میزبان شہر میں ہونے و الے اہم میچز کے ٹکٹ کی نرخوں میں بھی کچھ فرق تجویز کیا گیا ہے جبکہ جن میچز میں شائقین کی زیادہ دلچسپی نہیں ہوگی ان کے ٹکٹ سب سے کم ہوں گے۔ ٹکٹوں کے نرخوں کو چند روز میں فائنل کرکے پرنٹنگ کے لیے آرڈر دے دیاجائے گا۔ ٹکٹوں کی فروخت کا آغاز بیس جنوری سے ہوگا ۔
ذرائع کےمطابق یہ بھی بتایا جا چکا ہےکہ پی ایس ایل کی افتتاحی تقریب بیس فروری کونیشنل اسٹیڈیم کراچی میں ہوگی جبکہ فائنل بائیس مارچ کو قذافی سٹیڈیم لاہورمیں کھیلا جائے گا۔لیگ کے میچز چار مختلف شہروں لاہور،کراچی ،راولپنڈی اور ملتان میں کھیلے جائیں گے۔
واضح رہے کہ یہ پہلا موقع ہوگا جب پاکستان سپر لیگ مکمل طور پاکستان میں کھیلی جائے گی۔اس سے قبل لیگ یا تو مکمل طور پر متحدہ عرب امارات میں ہوئی ہے یا پھر کچھ میچز ہی پاکستان میں کھیلے گئے ہیں۔خیال رہے کہ پاکستان سپر لیگ کے سیزن فائیو کا شیڈول جاری کردیا گیا ہے۔
34 میچوں پر مشتمل ایونٹ کے 14 میچز قذافی اسٹیڈیم لاہور ، 9 نیشنل اسٹیڈیم کراچی، 8 پنڈی کرکٹ اسٹیڈیم راولپنڈی اور 3 ملتان کرکٹ اسٹیڈیم میں کھیلے جائیں گے۔پی ایس ایل 2020 کا افتتاحی میچ دفاعی چیمپئن کوئٹہ گلیڈی ایٹرز اور دو مرتبہ کی چیمپئن اسلام آباد یونائیٹڈ کی ٹیموں کے درمیان نیشنل اسٹیڈیم کراچی میں کھیلا جائے گا۔لیگ کے پانچویں ایڈیشن کا فائنل 22 مارچ کو قذافی اسٹیڈیم لاہور میں ہوگا۔
