کراچی: گلستان جوہر پولیس نے فیڈریشن آف پرائیویٹ اسکولز پاکستان کے وائس چیئرمین خالد رضا کے قتل کا مقدمہ ان کے بھائی کی مدعیت میں نامعلوم ملزمان کے خلاف درج کرلیا۔
باغی ٹی وی: پولیس کے مطابق گلستان جوہر میں 2 روز قبل نجی اسکول سسٹم کے عہدیدار خالد رضا کی ٹارگٹ کلنگ کا مقدمہ گلستان جوہر تھانے میں درج کرلیا گیا ہے۔
مقدمہ الزام نمبر 131/23 قتل کی دفعات کے تحت مقتول کے بھائی سید تنویر احمد کی مدعیت میں درج کیا گیا ہے،مقتول کو اتوار کی شب 8 بجکر 12 منٹ پر گھر کے باہر موٹرسائیکل سوار دو ملزمان نے فائرنگ کر کے قتل کیا۔
مدعی مقدمہ نے پولیس کو بیان دیا ہے کہ وہ گلستان جوہر بلاک 7 میں قائم اپنے گھر پر موجود تھے کے انھیں تقریباً رات 8 بجکر 12 منٹ پر فائر کی آواز سنائی دی جس کے بعد چیخوں اور شور شرابہ بھی سنائی دیا۔
انہوں نے بتایا کہ وہ گھر سے باہر نکلے تو دیکھا ایک موٹر سائیکل پر 2 اشخاص تیزی سے سڑک کی جانب جاتے ہوئے دکھائی دیئے جبکہ میرے بھائی خالد رضا خون میں لت پت سڑک پر پڑے ہوئے دکھائی دیئے جن کے سر سے خون بہت تیزی سے بہہ رہا تھا فوری طور پر پولیس کو اطلاع دی اوربھائی کو زخمی حالت سچل گوٹھ کے قریب واقع نجی اسپتال لے گیا جہاں ڈاکٹروں نےمعائنے کے بعد ان کی موت کی تصدیق کردی۔
قبل ازیں پولیس کا کہنا تھا کہ ملزمان نے گھات لگا کر واردات کی، ملزمان تربیت یافتہ تھے ایک ہی گولی چلائی جو سر پر لگی، شبہ ہے ملزمان نے ریکی کی ہوئی تھی، واردات کے لیے نیا اسلحہ استعمال کیا گیا ہے۔
ابتدائی تفتیش رپورٹ کے مطابق جائے وقوعہ سے ملنے والا تیس بور کا خول پہلے کسی واردات میں استعمال نہیں ہوا، ملزمان جس راستے سے آئے تھے اس کی فوٹیج حاصل کرنےکی کوشش کی جارہی ہے۔
