ڈیرہ غازیخان (باغی ٹی وی،سٹی رپورٹر جواد اکبر)ڈسٹرکٹ مائنز اینڈ منرلز کمیٹی ڈیرہ غازیخان کا اجلاس ڈپٹی کمشنر مہر شاہد زمان لک کی زیر صدارت منعقد ہوا، جس میں معدنیاتی وسائل، ٹھیکوں، رائلٹیز اور لیز کے امور پر غور کیا گیا۔
اجلاس میں ایڈیشنل ڈپٹی کمشنر جنرل اعتزاز انجم، پولیٹیکل اسسٹنٹ محمد اسد چانڈیہ، اسسٹنٹ کمشنر تیمور عثمان، اسسٹنٹ ڈائریکٹر مائنز محسن مقصود، ڈپٹی پبلک پراسیکیوٹر رفعت ناز، اور ڈی ایس پی مظہر مون بھی شریک تھے۔
ڈپٹی کمشنر مہر شاہد زمان لک نے اجلاس سے خطاب کرتے ہوئے کہا کہ معدنیاتی وسائل حکومت پنجاب کی ملکیت ہیں، اور ان کی حفاظت ہماری ذمہ داری ہے۔ انہوں نے معدنیاتی وسائل سے حکومتی آمدن میں اضافے کے لیے بھرپور کاوشیں کرنے کی ہدایت کی اور ضلع بھر میں معدنیات کی چوری روکنے کے لیے موثر حکمت عملی اپنانے کا حکم دیا۔
ڈپٹی کمشنر نے کہا کہ محکمہ پراسیکیوشن کے تعاون سے معدنیات چوری کرنے والوں کے خلاف مقدمات درج کیے جائیں اور سرکاری ریکوری کے نادہندگان کی گرفتاریوں کا سلسلہ شروع کیا جائے۔ زیر التوا واجبات کی وصولی کی رپورٹ روزانہ ڈی سی آفس کو پیش کرنے کی ہدایت بھی دی گئی۔
انہوں نے ریکوریوں اور ٹھیکوں کے معاملات میں شفافیت کو یقینی بنانے اور فیلڈ مانیٹرنگ اور سکیورٹی کے لیے سفارشات ارسال کرنے کا حکم دیا۔ اجلاس میں مائنز اینڈ منرلز کمیٹی کا ہفتہ وار اجلاس منعقد کرنے کی ضرورت پر بھی زور دیا گیا۔
