ڈیرہ غازیخان (باغی ٹی وی،سٹی رپورٹرجواد اکبر) ڈیرہ غازی خان ڈویژن میں صفائی اور ترقی کے عمل کو مزید تیز کرتے ہوئے "ستھرا پنجاب” پروگرام کے تحت ہر گاؤں کو ماڈل بنایا جائے گا۔ کمشنر ڈیرہ غازی خان ڈویژن ڈاکٹر ناصر محمود بشیر کی صدارت میں ہونے والے ویڈیو لنک جائزہ اجلاس میں یہ فیصلے کیے گئے۔ اجلاس میں پانچوں اضلاع کے ڈپٹی کمشنرز اور متعلقہ افسران نے شرکت کی۔
کمشنر ڈاکٹر ناصر محمود بشیر نے کہا کہ افرادی قوت اور مشینری کے ٹینڈر جاری کر دیے گئے ہیں اور صرف فیلڈ میں کام کرنے والے اہلکاروں کو تنخواہیں دی جائیں گی۔ انہوں نے مزید کہا کہ ڈویژن کو غیر قانونی پٹرول پمپس سے پاک کرنے کا حتمی فیصلہ کیا گیا ہے اور تمام غیر قانونی آئل یونٹس کو بند کر کے سربمہر کیا جائے گا۔
کمشنر نے یہ بھی ہدایت دی کہ پانچوں اضلاع میں زیر التواء بلڈنگز، ہاؤسنگ کالونیز، پٹرول پمپس اور دیگر منصوبوں کے این او سیز فوری طور پر جاری کیے جائیں۔ میرج ایکٹ کی خلاف ورزی کرنے والے شادی ہالز کو کم از کم ایک ہفتے کے لیے سیل کیا جائے گا، جبکہ بھاری جرمانے، گرفتاریاں اور دیگر قانونی کارروائیاں بھی عمل میں لائی جائیں گی۔
کاشتکاروں کو گنے کی مکمل ادائیگی یقینی بنانے پر بھی زور دیا گیا، اور ڈپٹی کمشنرز کو ہدایت کی گئی کہ وہ شوگر کین کی ادائیگی کرا کے سرٹیفکیٹ فراہم کریں۔ عام آدمی کو معاشی ریلیف فراہم کرنے کے لیے اشیائے خوردونوش کی سرکاری قیمتوں پر دستیابی کو یقینی بنانے کے احکامات بھی جاری کیے گئے ہیں، اور پرائس کنٹرول مجسٹریٹ کو ہدایت کی گئی کہ وہ فیلڈ میں نکلیں اور ناجائز منافع خوروں کے خلاف سخت کارروائی کریں۔
اجلاس میں وزیراعلیٰ کے اقدامات (سی ایم انیشیٹوز) اور دیگر اہم معاملات کا بھی جائزہ لیا گیا اور ان میں مزید بہتری کے لیے ضروری ہدایات جاری کی گئیں۔
