کراچی میں ٹریفک کے دو ہولناک حادثات میں 2 افراد جاں بحق اور ایک شخص زخمی ہوگیا۔ یہ حادثات رات گئے مختلف علاقوں میں پیش آئے۔
پہلا حادثہ کراچی کے علاقے ملیر کورٹ کے قریب پیش آیا جہاں ایک تیز رفتار ٹریلر نے موٹر سائیکل سواروں کو ٹکر مار دی۔ پولیس کے مطابق حادثے میں ایک شخص جاں بحق ہوگیا جبکہ ایک دوسرا شخص زخمی ہوا۔ جاں بحق ہونے والے شخص کی شناخت عامر کے نام سے ہوئی، جو پیدائشی طور پر گونگا اور بہرا تھا۔ عامر کچھ ماہ قبل ہی شادی کے بندھن میں بندھا تھا۔ زخمی کی شناخت ساجد کے طور پر کی گئی۔ دونوں افراد اپنے کزن کو کینٹ اسٹیشن چھوڑ کر واپس قائد آباد جارہے تھے کہ یہ افسوسناک حادثہ پیش آیا۔ حادثے کے بعد ٹریلر کا ڈرائیور گاڑی چھوڑ کر فرار ہوگیا۔ لواحقین کے مطابق عامر زخمی ساجد کا بہنوئی تھا۔
دوسرا حادثہ کراچی کی معروف شارع فیصل پر کارساز کے قریب پیش آیا جہاں ایک موٹر سائیکل سوار محمد شاکر ڈمپر کے پچھلے حصے سے ٹکرا گیا۔ پولیس کے مطابق شاکر کو فوری طور پر علاج کے لیے اسپتال منتقل کیا گیا، لیکن وہ دوران علاج جاں بحق ہوگیا۔ ورثا نے بغیر کسی کارروائی کے اس کی لاش جناح اسپتال سے وصول کی اور چلے گئے۔
اس سال کے ابتدائی دو مہینوں میں کراچی میں ٹریفک حادثات کی شرح میں اضافہ دیکھنے کو ملا ہے، جس کے نتیجے میں اب تک 119 افراد اپنی جان گنوا چکے ہیں۔ ان میں 87 مرد، 16 خواتین، 12 بچے اور 4 بچیاں شامل ہیں۔ یہ واقعات شہر میں ٹریفک کے قوانین کی خلاف ورزی اور لاپرواہی کے سنگین نتائج کی عکاسی کرتے ہیں۔
