وزیرِ مملکت برائے داخلہ سینیٹر طلال چوہدری نے جمعہ کے روز اڈیالہ جیل کے باہر چیئرمین پی ٹی آئی عمران خان کی بہن علیمہ خان کے ساتھ پیش آنے والے انڈہ پھینکنے کے واقعے پر ردعمل دیتے ہوئے کہا ہے کہ جو کچھ کل ہوا وہ دراصل پی ٹی آئی کے اپنے رویوں کا نتیجہ ہے۔
طلال چوہدری نے میڈیا سے گفتگو کرتے ہوئے کہا کہ "انڈے، جوتے اور سیاہی پھینکنے کی سیاست پی ٹی آئی نے متعارف کرائی تھی اور آج یہ خود اسی کا شکار بن گئے ہیں۔” انہوں نے مزید کہا کہ یہ طرزِ عمل معاشرتی اقدار اور سیاسی روایات کے منافی ہے۔وزیرِ مملکت نے وضاحت کی کہ انڈہ پھینکنے والی خواتین کا تعلق خیبر پختونخوا سے ہے۔ ان کا کہنا تھا کہ "حفاظتی تحویل اور پولیس کی جانب سے باضابطہ گرفتاری میں فرق ہوتا ہے، اور اب تک ان خواتین کے خلاف پولیس کو کوئی تحریری درخواست موصول نہیں ہوئی۔ پولیس منتظر ہے کہ درخواست آئے تو کارروائی آگے بڑھائی جائے۔ اسی طرح جن کی گاڑیاں توڑی گئیں وہ بھی اگر شکایت درج کرائیں تو پولیس کارروائی کرے گی۔”طلال چوہدری نے کہا کہ حکومت کو ایسی چھوٹی حرکتیں کرنے کی کوئی ضرورت نہیں ہے، یہ عمل براہِ راست پی ٹی آئی کی اپنی تربیت اور سیاسی حکمتِ عملی کا شاخسانہ ہے۔
یاد رہے کہ گزشتہ روز اڈیالہ جیل کے باہر اس وقت ہنگامہ کھڑا ہوگیا جب علیمہ خان میڈیا سے گفتگو کر رہی تھیں۔ دورانِ گفتگو ان پر دو انڈے پھینکے گئے جن میں سے ایک انڈہ براہِ راست انہیں لگا۔ واقعے کے بعد پی ٹی آئی کارکنان مشتعل ہوگئے اور پولیس نے موقع پر موجود دو خواتین کو حراست میں لے کر اڈیالہ چوکی منتقل کردیا۔ترجمان راولپنڈی پولیس نے بھی تصدیق کی ہے کہ انڈہ پھینکنے والی خواتین کا تعلق پاکستان تحریکِ انصاف سے ہی ہے۔
