گھوٹکی (باغی ٹی وی، نامہ نگار مشتاق علی لغاری)ڈہرکی ٹاؤن انتظامیہ کی بدانتظامی، نااہلی اور مجرمانہ غفلت کے خلاف بلدیاتی ملازمین سراپا احتجاج بن گئے۔ شاہ لطیف لوکل گورنمنٹ ایمپلائیز یونین اور آل پاکستان لوکل ورکرز فیڈریشن کی قیادت میں بلدیاتی ملازمین نے دفاتر کی تالہ بندی کرتے ہوئے مکمل ہڑتال کی اور احتجاجی مظاہرہ کیا۔
مظاہرین نے انتظامیہ کے خلاف شدید نعرے بازی کرتے ہوئے کہا کہ کئی ماہ گزرنے کے باوجود تنخواہیں وقت پر جاری نہیں کی جا رہیں، جبکہ موجودہ تنخواہوں میں بلاجواز کٹوتیاں کی جا رہی ہیں۔ ریٹائرڈ ہونے والے ملازمین کو گریجویٹی اور دیگر واجبات کی ادائیگی بھی تاحال نہیں کی گئی، جو سراسر ناانصافی اور قانون کی خلاف ورزی ہے۔
ملازمین کا کہنا تھا کہ حکومت کی جانب سے بجٹ میں اعلان کردہ اضافی تنخواہیں اور الاؤنسز بھی تاحال نہیں دیے جا رہے، جس کے باعث سینکڑوں سرکاری اہلکار شدید مالی مشکلات سے دوچار ہیں۔ کئی ملازمین بچوں کی فیسیں ادا کرنے اور گھریلو اخراجات پورے کرنے سے قاصر ہیں جبکہ ٹاؤن انتظامیہ خاموش تماشائی بنی ہوئی ہے۔
احتجاجی رہنماؤں نے واضح کیا کہ اگر ان کے جائز مطالبات فوری طور پر پورے نہ کیے گئے، جن میں تنخواہوں کی بروقت ادائیگی، ناجائز کٹوتیوں کا خاتمہ، ریٹائرڈ ملازمین کو واجبات کی فراہمی اور بجٹ میں شامل اضافی الاؤنسز کا نفاذ شامل ہے، تو احتجاج کا دائرہ کار بڑھا دیا جائے گا۔
انہوں نے اعلان کیا کہ مطالبات کی منظوری تک دفاتر بند رہیں گے، تمام سرکاری امور معطل رہیں گے، اور اس صورتحال کی مکمل ذمہ داری ڈہرکی ٹاؤن انتظامیہ پر عائد ہوگی۔ ملازمین نے صوبائی حکومت سے بھی فوری مداخلت کا مطالبہ کیا تاکہ ان کے مسائل حل ہو سکیں اور شہری سہولیات کا نظام بحال ہو۔
