محکمہ صحت خیبرپختونخوا میں بدعنوانی کا ایک اور اسکینڈل سامنے آگیا۔ محکمہ صحت خیبرپختونخوا میں 60 کروڑ روپے کی مبینہ کرپشن کا انکشاف ہوا ہے۔
نجی ٹی وی کے مطابق انکوائری رپورٹ میں اعلیٰ افسران پر غیر مجاز ادائیگیوں کے الزامات عائد کیے گئے ہیں، سابق ڈی جی ہیلتھ ڈاکٹر شوکت علی، ڈاکٹر مبشر احمد اور اکاؤنٹنٹ فضل دیان کو ذمہ دار قرار دیا گیا ہے۔ رپورٹ میں کہا گیا ہے کہ ایک نجی کمپنی کو جعلی انوائسز پر 7 کروڑ 99 لاکھ روپے کی ادائیگی کی گئی، دائیگی کے بعد مطلوبہ سامان کی فراہمی کا کوئی ثبوت موجود نہیں، گاڑیوں کی جعلی مرمت کے نام پر 6 کروڑ 12 لاکھ روپے ادا کیے گئے۔انکوائری رپورٹ کے مطابق بینک منافع کی 10 کروڑ 13 لاکھ روپے رقم خزانے میں جمع نہیں کرائی گئی، ٹیکس کٹوتی نہ ہونے سے حکومت کو 5 کروڑ روپے سے زائد کا نقصان ہوا، 30 کروڑ 68 لاکھ روپے بچت کی رقم جی ایف آر رولز کے برعکس واپس نہ کی گئی۔انکوائری کمیٹی نے ذمہ دار افسران کیخلاف سخت محکمانہ کارروائی کی سفارش کردی۔
