fbpx

شیخوپورہ کی قدیم درسگاہ میں عظیم الشان تقریب کا انعقاد

شیخوپورہ (نمائندہ باغی ٹی وی)شیخوپورہ کی قدیم اور عظیم دینی درسگاہ دارالعلوم محمدیہ پرانا اڈہ لاریاں میں حفظ و تجوید القرآن اور درس نظامی کی تکمیل کرنے والے طلبہ کے اعزاز میں سالانہ تقریب تقسیم اسناد منعقد ہوئی جس میں 52طلبہ میں خطیب دارالعلوم محمدیہ حافظ محمد قسیم شیخوپوری، رئیس الجامعہ حاجی صابر علی، مہتمم جامعہ قاری عبدالحفیظ نے میڈلز، اسناداور شیلڈیں تقسیم کیں

اس موقع پر قاری القرآن حافظ عبدالرحمن شیخوپوری، شیخ الحدیث قاری انصر محمود، حافظ محمد نعمان، قاری و حافظ محمد افضل، عثمان صابر، عبدالناصرو دیگر علماء، قراء و حفاظ موجود تھے، تقریب تقسیم انعامات کے شرکاء سے خطاب کرتے ہوئے حافظ محمد قسیم شیخوپوری نے کہا کہ ہزاروں عام مسلمانوں کی رات بھر کی عبادت سے ایک عالم دین کی نیند افضل ہے علماء اسلام کو اللہ تعالیٰ نے جن درجات سے نوازا ہے ان کے برابر کسی اور کا درجہ نہیں علماء کرام انبیاء علیھم السلام کی علمی میراث کے وارث ہیں نبی کریم ﷺ نے حصول علم کی بار بار تلقین فرمائی اور واضح کیا کہ علم حاصل کرو گود سے لیکر لہد تک، لہذاٰ علم حاصل کرنا افضل ترین عبادت اور ہر مسلمان پر فرض ہے تاکہ وہ جہالت کے اندھیروں سے نجات حاصل کرکے شیطان ملعون کی عیاری اور بہکاوے کا شکار ہونے سے بچ سکے

اس موقع پر خطاب کرتے ہوئے مہتمم جامعہ قاری عبدالحفیظ نے کہا کہ محدود وسائل کے باوجود جامعہ ہذاٰ نے علمی سفر جاری رکھا ہے یہاں سے فارغ التحصیل طلبہ دینی میدان میں ملک و ملت کی خدمت کرتے آرہے ہیں، ہر سال ایک بڑی تعداد میں طلبہ یہاں حفظ و تجوید اور درس نظامی کی تعلیم حاصل کرکے ملک بھر میں فیضان علم سے مسلمانوں کو فیضیاب کررہے ہیں، امسال 52 طلبہ نے تعلیم مکمل کی جن میں درس نظامی کے 13، تجوید القرآن کے 15اور حفظ القرآن کے 22طلبہ شامل ہیں،

شیخ الحدیث قاری انصر محمود نے کہا کہ قرآن و حدیث ہدایت کا سرچشمہ ہیں جن میں اللہ تعالیٰ نے انسانوں کی ہدایت کا سامان رکھا ہے جس سے استفادہ کے بغیر راہ فلاح و نجات ممکن نہیں، مدارس اسلام کے مضبوط قلعے اور مورچے ہیں جن میں زیر تعلیم طلبہ حصول علم دین پر بھرپور توجہ دیں۔

جواب چھوڑیں

آپ کا ای میل ایڈریس شائع نہیں کیا جائے گا.