ڈاکٹرغلام مصطفی بڈانی
ابدالی میزائل: پاکستان کی خودداری، سائنسی برتری اور دفاعی عزم کا استعارہ
تحریر: سیدریاض جاذب
ابدالی میزائل کا کامیاب تجربہ پاکستان کی زندہ و پائندہ قوم کا ایک واضح دفاعی پیغام ہے۔ جب دشمن جارحیت پر اتر آئے اور سازشوں کا جال بُننے لگے، تب پاکستان خاموش نہیں رہتا بلکہ اپنے عزم، اتحاد اور ہتھیاروں کی طاقت سے جواب دیتا ہے۔ حالیہ دنوں میں پاکستان نے زمین سے زمین پر مار کرنے والے ابدالی میزائل کا کامیاب تجربہ کر کے دنیا کو بتا دیا کہ ہم امن کے خواہاں ہیں لیکن کمزور ہرگز نہیں۔
450 کلومیٹر کی رینج کے حامل اس جدید میزائل نے پاکستان کی دفاعی صلاحیتوں کو ایک نئی بلندی عطا کی ہے۔ یہ نہ صرف ایک عسکری کامیابی ہے بلکہ دشمن عناصر کے لیے ایک ناقابلِ تسخیر پیغام بھی ہے جو پاکستان کی سالمیت کو چیلنج کرنے کی کوشش کرتے ہیں۔ ابدالی میزائل صرف ایک ہتھیار نہیں بلکہ پاکستانی قوم کے عزم، خودداری اور نظریاتی قوت کا عکاس ہے۔
بھارت کی جانب سے ایک بار پھر جھوٹے الزامات اور دھمکیوں کا سلسلہ جاری ہے۔ پہلگام حملے کا بے بنیاد الزام، سندھ طاس معاہدے کو معطل کرنے کی دھمکی اور پاکستانیوں کے ویزوں کی منسوخی اس بوکھلائے ہوئے دشمن کی ناکام چالیں ہیں۔ بھارت کو یہ یاد رکھنا چاہیے کہ پانی کی بندش کو پاکستان جنگ کے مترادف سمجھے گا۔ تاریخ گواہ ہے کہ جب بھی پاکستان کے خلاف جارحیت کی گئی، اس نے دشمن کو منہ توڑ جواب دیا۔
پاکستان کی قومی سلامتی کمیٹی نے جرات مندانہ فیصلوں کے ذریعے بھارت کو واضح پیغام دیا ہے۔ سفارتی محاذ پر جوابی حکمت عملی نے بھارت کو مشکلات سے دوچار کیا ہے۔ اقوامِ متحدہ میں پاکستان کے پُرزور مؤقف نے ایک خوددار ریاست کے وقار کو اجاگر کیا۔ دنیا کو اس کشیدگی پر تشویش ہے کہ دو ایٹمی طاقتوں کے درمیان تناؤ کسی بڑے المیے کا سبب نہ بن جائے، لیکن بھارت کی ہٹ دھرمی بدستور جاری ہے۔
ہمیں اپنی افواج، سائنسدانوں اور قیادت پر فخر ہے۔ ابدالی میزائل صرف ایک ہتھیار نہیں، بلکہ ہماری خودی، غیرت اور آزادی کا محافظ ہے۔ یہ تجربہ قوم کے ہر فرد کی جیت ہے۔ یہ پیغام ان سب کے لیے ہے جو پاکستان کی نظریاتی سرحدوں پر حملہ آور ہونے کی کوشش کرتے ہیں۔
پاکستان جاگ رہا ہے۔ پوری قوم افواجِ پاکستان کے شانہ بشانہ کھڑی ہے۔ دشمن کی نیندیں حرام ہو چکی ہیں، کیونکہ اسے معلوم ہے کہ پاکستان متحد، مستحکم اور اپنے دفاع کے لیے ہر دم تیار ہے۔ آئیے، متحد ہو کر دنیا کو دکھائیں کہ پاکستان ہمیشہ زندہ باد رہے گا کیونکہ پاکستان کا مطلب ہے… لا إله إلا الله!
پاکستان زندہ باد!
افواجِ پاکستان پائندہ باد!
