دوستی نہ کرنے پر دوست کو قتل کرنیوالا ملزم گرفتار

کیپٹل سٹی پولیس پشاور نے تھانہ رحمان بابا کی حدود میں نوجوان کے اندھے قتل کا سراغ لگا کر واقعہ میں ملوث ملزم کو گرفتار کر لیا. گرفتار ملزم نے ابتدائی تفتیش کے دوران نوجوان داؤد کو دوستی نہ کرنے پر قتل کرنے کا اعتراف کر لیا ہے۔ ملزم سے مزید تفتیش شروع کر دی گئی ہے ۔
تفصیلات کے مطابق تھانہ رحمان بابا پولیس کو باڑہ خوڑ حماد ٹاون میں ایک نوجوان کی لاوارث لاش ملی جس کو کسی ملزم یا ملزمان نامعلوم نے اسلحہ آتشین سے فائرنگ کر کے قتل کیا تھا جس کی شناخت بعد میں داؤد ولد خائستہ گل سکنہ رشید گھڑی کے نام سے ہوئی۔ مقامی پولیس نے نامعلوم ملزمان کے خلاف مقدمہ درج کرکے تفتیش شروع کر دی۔

ایس پی صدر سر کل وقار احمد نے نوجوان کے اندھے قتل کا سختی سے نوٹس لیتے ہوئے ڈی ایس پی صدر عالمزیب خان کی سربراہی میں سر کل آفیسر شہنشاہ خان ( تفتیش) ، ایس ایچ او تھانہ رحمان بابا عصمت اللہ پر مشتمل خصوصی ٹیم تشکیل دے کر واردات میں ملوث ملزمان کا سراغ لگا کر گرفتار کرنے کا ٹاسک حوالہ کیا جنہوں نے جدید سائنسی خطوط پر تفتیش جاری رکھتے ہوئے مقتول کے رشتہ داروں اور قریبی دوستوں کو بھی شامل تفتیش کیا جس کے دوران شک گزرنے اور بار بار متضاد بیانات کو مدنظر رکھتے ہوئے ملزم سنی ولد دلاور سکنہ دیر کالونی کو انٹاروگیٹ کرنے کا فیصلہ کیا گیا جس نے ابتدائی تفتیش اور سرسری انٹاروگیشن کے دوران مقتول داؤد کو دوستی نہ کرنے کی بناء پر قتل کرنے کا اعتراف کر لیا۔ ملزم سے مزید تفتیش جاری ہے جبکہ دوران تفتیش ملزم نے دوسرے ساتھی کا نام بھی اگل دیا جس کی گرفتاری کیلئے خصوصی ٹیم تشکیل دے دی گئی ہے ۔

جواب چھوڑیں

آپ کا ای میل ایڈریس شائع نہیں کیا جائے گا.