امریکہ مشرق وسطیٰ میں مزید کتنی فوج تعینات کرے گا؟ اہم خبر آ گئی

امریکہ نے مشرق وسطیٰ میں‌ مزید 1000 فوجی تعینات کرنے کا اعلان کیا ہے۔ پینٹاگون کی طرف سے جاری کردہ بیان کے مطابق امریکی نائب وزیر دفاع پیٹرک شاناہن سے یہ بات منسوب کی گئی ہے کہ سینٹرل کمان کی درخواست پرعمل درآمد کرتے ہوئے مزید ایک ہزار فوجیوں کو مشرق وسطیٰ میں تعینات کرنے کا فیصلہ کیا گیا ہے تاکہ خطے میں فضائی، بری اور بحری خطرات سے نمٹنے میں مدد لی جا سکے۔

باغی ٹی وی کی رپورٹ‌ کےمطابق خلیج عمان میں‌ آبنائے ہرمز کے قریب تیل بردار جہازوں‌ پر کئے جانے والے حملوں‌ میں‌ امریکہ اور برطانیہ کی جانب سے ایران کو ملوث‌ قرار دیا گیا ہے جبکہ سعودی عرب نے بین الاقوامی برادری سے خطہ کی آبی حدود کو محفوظ بنانے کا مطالبہ کیا ہے.

رپورٹ کے مطابق امریکی جنرل پیٹرک کا کہنا ہے کہ ان کا ملک جنگ نہیں چاہتا۔ ان کا پہلا مقصد خطے میں امریکی مفادات اور وہاں پر کام کرنے والے امریکی شہریوں کی جان ومال کا تحفظ ہے۔ ہم خطے میں اپنے مفادات اور شہریوں کے تحفظ کے پیش نظر انٹیلی جنس اداروں کی مصدقہ معلومات کی روشنی میں سیکورٹی پلان تیار کرتے ہیں۔

واضح رہے کہ اس سے قبل مختلف امریکی عہدیداروں نے بین الاقوامی ذرائع ابلاغ سے گفتگو کرتے ہوئے کہا تھا کہ امریکہ مشرق وسطیٰ میں‌ مزید فوج بھیجنے کی تیاری کر رہا ہے.