ناظم جوکھیوقتل کیس: جام عبدالکریم کا نام ای سی ایل میں ڈالنے کی منظوری:پی پی قیادت پریشانی میں مبتلا

اسلام آباد:ایک طرف عدم اعتماد تو دوسری طرف ایک نئی بحث شروع ہوچکی ہے ، ادھر اسی سلسلے میں‌ وزارت داخلہ نے پیپلزپارٹی کے رکن قومی اسمبلی جام عبدالکریم کا نام ای سی ایل میں ڈالنے کی منظوری دے دی۔

اسلام آباد سے وزارت داخلہ ذرائع کے مطابق ای سی ایل کمیٹی اجلاس میں وزیر داخلہ شیخ رشید نے جام عبدالکریم کا نام ای سی ایل میں ڈالنے کی سفارش کی جس کے بعد ان کا نام ای سی ایل میں ڈالنے کی منظوری دی گئی۔ڈی جی ایف آئی اے کو ریڈ وارنٹ جاری کرنے کے لیے انٹرپول کو خط لکھنے کی ہدایت کی گئی ہے۔

وزیر داخلہ کی جانب سے ایف آئی اے کو ہدایت کی گئی کہ جام عبدالکریم کو دبئی سے انٹرپول کے ذریعے گرفتار کیا جائے، اجلاس میں وزیر داخلہ، وزیر قانون اور دیگر افسران شریک تھے۔

واضح رہے کہ ناظم جوکھیو قتل کیس میں مفرور پیپلزپارٹی کے رکن اسمبلی جام کریم نے وطن پہنچ کر سندھ ہائیکورٹ سے حفاظتی ضمانت کروالی۔ذرائع کا کہنا تھا کہ ہائیکورٹ نے رکن قومی اسمبلی جام کریم کی 10 دن کی حفاظتی ضمانت منظور کرلی۔

ذرائع کا بتانا تھا کہ قتل کیس میں نامزد جام کریم عدم اعتماد میں ووٹ ڈالیں گے، واضح رہے کہ ناظم جوکھیو قتل کیس میں مقدمہ درج ہونے پر جام کریم دبئی چلے گئے تھے۔

گزشتہ روز معاون خصوصی برائے سیاسی روابط شہباز گل کا کہنا تھا کہ اپوزیشن والوں نے قانون کو مذاق بنادیا ہے، جام کریم کا نام ای سی ایل میں ڈلوائیں گے۔ان کا کہنا تھا کہ ان کا نام ای سی ایل میں اس لیے ڈلوائیں گے تاکہ وہ دوبارہ فرار نہ ہوسکیں۔

یاد رہے کہ اس سے پہلے ایڈمنسٹریٹر کراچی بیرسٹر مرتضیٰ وہاب نے کہا تھا کہ ضمانت کے باوجود گرفتاریوں کے احکامات خلافِ قانون ہے۔تفصیلات کے مطابق مرتضیٰ وہاب نے میڈیا سے گفتگو کرتے ہوئے کہا کہ ضمانت کے باوجود گرفتاریوں کے احکامات خلافِ قانون ہے، فیصلہ عدالت نے کرنا ہے،الزام تراشی درست نہیں۔ ماضی میں بھی عدالتی فیصلے قبول کیے۔یاد رہےکہ مذکورہ ایم این ائے قتل کے بعد دبئی فرارہوگئے تھے