سابق صدر آصف زرداری اور خواجہ سعد رفیق کے پروڈکشن آرڈر جاری، آج بجٹ پر بحث میں حصہ لیں‌ گے

اپوزیشن کا شدید احتجاج رنگ لے آیا، سپیکر قومی اسمبلی اسد قیصر نے سابق صدر آصف علی زرداری اور مسلم لیگ ن کے رکن قومی اسمبلی خواجہ سعد رفیق کے پروڈکشن آرڈرز جاری کردیے ہیں جس پر پیپلز پارٹی اور ن لیگ کے کارکنان نے خوشی کا اظہا رکیا ہے۔

باغی ٹی وی کی رپورٹ‌ کے مطابق پچھلے کئی دنوں‌ سے قومی اسمبلی میں‌ اپوزیشن لیڈر شہباز شریف، بلاول بھٹو اور دیگر رہنماؤں کی جانب سے سابق صدر آصف زرداری اور دیگر لیڈروں کے پروڈکشن آرڈر جاری کئے جانے کا مطالبہ کیا جارہا تھا، اس دوران متعدد مرتبہ اجلاس بھی ملتوی ہوئے تاہم آج حکومت اور اپوزیشن میں پروڈکشن آرڈرز کا معاملہ حل ہوگیا ہے ۔ سپیکر قومی اسمبلی نے سابق صدر آصف علی زرداری اور خواجہ سعد رفیق کے پروڈکشن آرڈرز جاری کردیے ہیں۔ تازہ ترین صورتحال کے مطابق پروڈکشن آرڈرز جاری ہونے پر دونوں رہنما آج جمعرات کو قومی اسمبلی کے بجٹ سیشن میں شریک ہوں گے اور بجٹ پر ہونے والی بحث میں حصہ لیں گے۔

رپورٹ کے مطابق پیپلز پارٹی کے سینئر رہنما خورشید شاہ نے بھی سابق صدر آصف زرداری کے پروڈکشن آرڈر جاری ہونے کی تصدیق کرتے ہوئے ’ دیر آید درست آید‘ کا تبصرہ کیا ہے. کہا گیا ہے کہ وزارت قانون کی طرف سے رائے ملنے کے بعد سپیکر نے یہ فیصلہ کیا ہے. یہ بھی بتایا گیا ہے کہ پروڈکشن آرڈر جاری کرنے سے پہلے سپیکر اسد قیصر پی پی رہنما خورشید شاہ کے ساتھ رابطے میں رہے اور انہیں بار بار فون کرتے رہے۔

واضح‌رہے کہ سابق صدر آصف علی زرداری کو 10 جون کو نیب نے جعلی اکاﺅنٹس کیس میں زرداری ہاﺅس اسلام آباد سے گرفتار کیا تھا جبکہ مسلم لیگ ن کے رہنما خواجہ سعد رفیق کو 11 دسمبر 2018 کو ان کے بھائی خواجہ سلمان رفیق سمیت پیراگون ہاﺅسنگ سکینڈل میں گرفتار کیا گیا تھا. دونوں‌ رہنماؤں کے پروڈکشن آرڈر جاری ہونے پر وہ آج بجٹ سے متعلق بحث میں حصہ لے سکیں‌ گے.
قومی اسمبلی کا بجٹ سیشن 29 جون تک جاری رہے گا. پیپلز پارٹی کے رہنما خورشید شاہ نے کہا ہےکہ آصف زرداری آج قومی اسمبلی میں‌ بجٹ پر بحث میں‌ حصہ لیں‌ گے.