fbpx

ترک فوجیوں پرحملے میں 3 اہلکار جاں بحق اور 3 زخمی

ادلب:ترک فوجیوں پرحملے میں 3 اہلکارجاں بحق اور 3 زخمی ،اطلاعات کےمطابق ادلب میں سرچ آپریشن کے دوران ترک فوجیوں پرمسلح افراد نے دھاوا بول دیا جس کے نتیجے میں 3 اہلکار جاں بحق اور3 شدید زخمی ہوگئے۔

ترک میڈیا کے مطابق ترک وزارت دفاع نے تصدیق کی ہے کہ شام میں ترک فوجیوں پر حملہ کیا گیا ہے۔ یہ حملہ اُس وقت کیا گیا جب ترک فوجی ادلب کے ایک علاقے میں باغیوں کے خلاف سرچ آپریشن کر رہے تھے۔

وزارت دفاع کی جانب سے جاری بیان میں کہا گیا ہے کہ حملے میں 3 اہلکار جاں بحق اور 3 زخمی ہوگئے۔ زخمیوں کو قریبی اسپتال منتقل کردیا گیا ہے جہاں ایک زخمی کی حالت نازک بتائی جارہی ہے۔

جس علاقے میں ترک فوجیوں پر حملہ کیا گیا وہ علاقہ باغیوں کا آخری ٹھکانہ ہے جن کی سرکوبی کے لیے ترک فوجیوں کی ایک ٹیم سرچ آپریشن میں مصروف تھی۔ فی الحال ہلاک اور زخمی ہونے والے ترک فوجیوں کی شناخت ظاہر نہیں کی گئی ہے۔

واضح رہے کہ ترک فوجیں شام میں کرد باغیوں کے خلاف آپریشن کے لیے داخل ہوئی تھیں تاہم گزشتہ برس مارچ میں جنگ بندی معاہدے کے نتیجے میں اس علاقے میں شامی اور روسی افواج نگرانی کے آپریشنز کر رہی ہیں۔