باجوڑ (باغی ٹی وی رپورٹ) ضلع باجوڑ میں امن کے فروغ کے لیے پاک فوج، فرنٹیئر کور نارتھ، اور ضلعی انتظامیہ کے تعاون سے منعقدہ خیبرپختونخواہ امن فٹبال ٹورنامنٹ رنگارنگ اختتامی تقریب کے ساتھ اختتام پذیر ہو گیا۔
پانچ روزہ ٹورنامنٹ میں مختلف اضلاع کی 16 ٹیموں نے حصہ لیا۔ اختتامی تقریب کے مہمان خصوصی انسپکٹر جنرل فرنٹیئر کور نارتھ، میجر جنرل انجم ریاض تھے۔ فائنل میچ میں باجوڑ کی ٹیم نے چترال کی ٹیم کو سنسنی خیز مقابلے کے بعد پینلٹی ککس پر شکست دی۔
تقریب میں فرنٹیئر کور نارتھ کے بینڈ نے شاندار قومی دھنیں پیش کیں، جب کہ علاقائی فنکاروں نے روایتی موسیقی اور رقص پیش کرکے تقریب کو چار چاند لگا دیے۔ شاندار آتش بازی کے مظاہرے نے شرکاء کو مسحور کر دیا۔
مہمان خصوصی نے کھلاڑیوں میں میڈلز، ٹرافیاں اور انعامات تقسیم کیے۔ ٹورنامنٹ کے انعقاد پر کھلاڑیوں، عوام، اور نوجوانوں نے مسرت کا اظہار کرتے ہوئے کہا کہ یہ مقابلے باجوڑ میں امن کے ثمرات کا ثبوت ہیں۔
شرکاء نے اس امید کا اظہار کیا کہ اس طرح کے ٹورنامنٹس کا انعقاد مستقل طور پر جاری رکھا جائے تاکہ نوجوانوں کو مثبت سرگرمیوں میں مصروف رکھا جا سکے اور علاقے میں کھیلوں کو فروغ ملے۔
