بجرنگی بھائی جان کی چائلڈ اسٹار دوبارہ سلمان خان کے ساتھ اداکاری کرنے کی خواہشمند

بالی وڈ فلم ‘بجرنگی بھائی جان’ میں مُنی کا کردار ادا کرنے والی چائلڈ اسٹار ہرشالی ملہوترا نے سلمان خان کے ساتھ دوبارہ کام کرنے کی خواہش کا اظہار کیا ہے۔

باغی ٹی وی : ہرشالی ملہوترا نے 2015 میں فلم ‘بجرنگی بھائی جان’ سے بطور چائلڈ اسٹار اپنا ڈیبیو کیا تھا انہوں نے فلم میں ایک گونگی بہری لڑکی کا کردار ادا کیا تھا جو مسلمان اور پاکستانی ہوتی ہے اور بھارت میں اپنے والدین سے بچھڑ جاتی ہے۔ فلم میں سلمان خان بچی کو اس کے والدین سے ملوانے کے لیے مشکلات اور جد و جہد کا سامنا کرتے ہوئے پاکستان پہنچتے ہیں یہی اس فلم میں دکھایا گیا تھا۔

اس وقت ہرشالی ملہوترا کی عمر 7 سال تھی اور انہوں نے اپنی فلم کے لیے بہترین ڈیبیو فیمیل ایوارڈ بھی حاصل کیا تھا فلم میں سلمان خان کے علاوہ نوازالدین صدیقی، کرینہ کپور اور مہر وج نے اداکاری کی تھی۔

اب 5 برس بعد بھارت کے تہوار دیوالی کے موقع پر ہرشالی ملہوترا کی تصاویر وائرل ہوئیں جس میں وہ بالکل مختلف نظر آرہی ہیں وہ اب 12 سال کی ہیں اور ان کی تصاویر دیکھتے ہی دیکھتے سوشل میڈیا پر وائرل ہوگئیں-

ان کے سوشل میڈیا اکاؤنٹ پر پوسٹ کی گئی تصاویر میں انہوں نے سُرخ رنگ کا لباس پہنا ہوا ہے، ایک تصویر میں وہ رنگولی بنارہی ہیں جبکہ اگلی تصویر میں ان کے ہاتھ میں دیا ہے۔

بھارتی خبر رساں ادارے ٹائمز آف انڈیا کو دیئے گئے انٹرویو میں ہرشالی ملہوترا نے کہا کہ وہ ایک اداکارہ بننا چاہتی ہیں انہوں نے کہا کہ جیسے ہی مجھے کوئی اچھا رول ملے گا میں بڑی اسکرین پر واپس آؤں گی۔

اپنی تصاویر وائرل ہونے سے متعلق ہرشالی ملہوترا نے کہا کہ میں خوش ہوں کہ میری تصاویر دوبارہ سوشل میڈیا پر ٹرینڈ کر رہی ہیں انہوں نے تمام مداحوں کا شکریہ ادا کیا جو ان سے بہت زیادہ محبت کرتے ہیں۔

اپنے سوشل میڈیا اکاؤنٹس سے متعلق ہرشالی ملہوترا نے بتایا کہ ان کی والدہ ان کے اکاؤنٹس ہینڈل کرتی ہیں کیونکہ ان کی والدہ کا خیال ہے کہ وہ خود سے یہ سب ہینڈل کرنے کے لیے ابھی بہت چھوٹی ہیں اور ان کی والدہ حوصلہ افزائی کے لیے مداحوں کی جانب سے موصول ہونے والے پیغامات سے آگاہ رکھتی ہیں۔

ہرشالی نے یہ بھی بتایا کہ بجرنگی بھائی جان کے بعد انہیں کئی فلموں کی آفر ہوئی تھیں یہاں تک کہ ساؤتھ سے بھی لیکن وہ رولز ‘مُنّی’ جتنے اچھے نہیں تھے۔

انہوں نے یہ بھی کہا کہ میں اپنی پڑھائی اور اپنے شوق کو ایک ساتھ لے کر چلنے کی صلاحیت رکھتی ہوں، لہٰذا میں اپنی پڑھائی کی وجہ سے کسی اچھے رول کو مسترد نہیں کروں گی۔

ہرشالی ملہوترا نے ایک سوال کےجواب میں کہا کہ وہ دوبارہ سلمان انکل کے ساتھ کام کرنا چاہیں گی اور دیگر تمام سپر اسٹارز بھی بہت زبردست ہیں۔

انہوں نے کہا کہ اگر مجھے موقع ملا اور میرا رول اچھا ہوا تو میں کسی بھی سپر اسٹار کے ساتھ کام کرنا پسند کروں گی-

ہرشالی نے کہا کہ سلمان خان بہت خیال رکھنے والے مزاحیہ اور بہت زیادہ تعاون کرتے ہیں اور وہ شاٹس کے درمیان میری رہنمائی بھی کرتے تھے۔

انہوں نے کہا کہ سلمان خان کیونکہ بہت مصروف شخصیت ہیں لہٰذا ہم زیادہ بات چیت نہیں کرتے لیکن میں انہیں ان کی سالگرہ کی مبارکباد دیتی ہوں اور مختلف مواقع پر میسج بھی کرتی ہوں۔

واضح رہے کہ 5 سال قبل 2015 میں ریلیز ہونے والی فلم ’بجرنگی بھائی جان‘ نے باکس آفس پر مقبولیت کے کئی ریکارڈز توڑ دئیے تھے۔ اس فلم میں سلمان خان نے مرکزی کردار ادا کیا تھا اورایک ننھی معصوم سی اداکارہ ہرشالی ملہوترا کو’منی‘ کے کردار میں متعارف کرایا گیا تھا۔

’بجرنگی بھائی جان‘ میں مسلمان پاکستانی لڑکی کا کردار ادا کرنے والی اداکارہ اب کیسی دکھتی ہیں

جواب چھوڑیں

آپ کا ای میل ایڈریس شائع نہیں کیا جائے گا.