بدمعاشوں اور قبضہ گروپوں کے خلاف وزیراعظم نے سخت احکام جاری کردیے

بدمعاشوں اور قبضہ گروپوں کے خلاف وزیراعظم نے سخت احکام جاری کردیے

باغی ٹی وی رپورٹ:وزیراعظم عمران خان نے کہا ہے کہ کوئی قانون سے بالاتر نہیں، پولیس کسی سیاسی اثرورسوخ کو خاطر میں نہ لائے۔ لوگ آپ سے تب مطمئن ہوں گے جب آپ سب سے یکساں اور قانون کے مطابق سلوک کریں گے۔

تفصیل کے مطابق وزیراعظم عمران خان کے زیر صدارت پنجاب پولیس میں اصلاحات اور کارکردگی کے حوالے سے اجلاس ہوا۔ آئی جی پنجاب انعام غنی نے وزیراعظم کو پنجاب پولیس کی کارکردگی میں بہتری لانے کے لیے کی جانے والی اصلاحات اور اقدامات پر بریفنگ دی۔ انہوں نے بتایا کہ پولیس سٹیشنز کی مالی خود مختاری اور مصالحتی کونسل کے مکینزم کے حوالے مجوزہ تجاویز وزیراعلیٰ کو پیش کر دی گئی ہیں۔

اس موقع پر اپنے خطاب میں وزیراعظم نے ہدایت کی کہ عوام کے جان ومال کے تحفظ کو یقینی بنانے کے لیے تمام وسائل بروئے کار لائے جائیں۔ عوام کے مسائل کے حل میں صرف میرٹ پر عملداری کی جائے۔

انہوں نے آئی جی پنجاب کو ہدایت کی کہ انصاف کی فراہمی کی راہ میں حائل اہلکاروں کو کڑی سے کڑی سزا دی جائے۔ ماضی میں پولیس میں سیاسی بھرتیاں کی گئیں، جس کا نقصان لوگوں کو اٹھانا پڑا۔

عمران خان نے ہدایت کی کہ پولیس افسران جرائم کے خاتمے کے لیے جدید ٹیکنالوجی کا استعمال کریں اور تھانوں میں وزٹ کریں۔ پنجاب پولیس کا امیج بہتر کرنے کی ضرورت ہے اور اس کے لیے آپ کو بہت محنت کرنا پڑے گی۔

وزیر اعظم عمران خان کی زیر صدارت پنجاب میں زرعی پیداوار کی استعداد میں اضافے اور ویلیو چین کے حوالے سے اجلاس۔#APPNews #Pakistan #PMimranKhan #Lahore @ImranKhanPTI @UsmanAKBuzdar @PakPMO pic.twitter.com/hg7V0fbGpg

— APP 🇵🇰 (@appcsocialmedia) January 15, 2021

ان کا کہنا تھا کہ اہم پوزیشنز پر ایماندار افسران تعینات کرنے کا اثر گراس روٹ تک جاتا ہے۔ پنجاب میں تمام تعیناتیاں صرف میرٹ اور کارکردگی کی بنیاد پر کی جائیں تا کہ لوگوں کی انصاف تک حقیقی رسائی ممکن ہو سکے۔

عمران خان کا کہنا تھا کہ جب آپ بڑے جرائم پیشہ افراد کو قانون کی گرفت میں لائیں گے تو چھوٹے جرائم پیشہ عناصر کے لئے یہ سبق ہوگا۔ قبضہ مافیا کے خلاف بھرپور ایکشن لیا جائے۔

وزیراعظم نے چیف سیکرٹری پنجاب اور آئی جی پنجاب کی کارکردگی پر اطمینان کا اظہار کیا۔ اجلاس میں وزیراعلیٰ پنجاب سردار عثمان بزدار اور معاون خصوصی شہزاد اکبر بھی موجود تھے۔

اس سے قبل وزیراعظم عمران خان سے وزیراعلی پنجاب سردار عثمان بزدار نے ملاقات کی۔ ملاقات میں وزیراعظم نے کورونا سے صحت یاب ہونے پر وزیراعلیٰ کے لئے نیک خواہشات کا اظہار کیا۔ وزیراعلیٰ نے صوبے کےانتظامی امور بارے وزیراعظم کو بریف کیا۔

وزیراعظم کو لاہور میں قبضہ مافیا کے خلاف کیے گئے اقدامات سے متعلق رپورٹ پیش کرتے ہوئے بتایا گیا کہ لاہور میں دو سالوں میں 31 ارب مالیت کی زمین قبضہ مافیا سے واگزار کرائی۔ پنجاب حکومت نے لاہور میں 1250 ایکڑ زمین واگزار کرائی۔ وزیراعظم عمران خان نے ہدایت کی کہ قبضہ مافیا اور بدمعاشوں کو کسی صورت معافی نہ دی جائے۔ قبضہ مافیا سے متعلق اقداامت بارے پنجاب حکومت اچھا کام کر رہی ہے