کابینہ کمیٹی برائے لاء اینڈ آرڈر نے محرم الحرام کے حوالے سے ڈیرہ غازی خان کا دورہ کیا

ڈیرہ غازیخان،باغی ٹی وی (سٹی رپورٹرجواد اکبر) وزیراعلی پنجاب مریم نواز شریف کی ہدایت پر کابینہ کمیٹی برائے لاء اینڈ آرڈر نے محرم الحرام کے حوالے سے ڈیرہ غازی خان کا دورہ کیا۔کمشنر آفس ڈی جی خان میں اعلی سطحی اجلاس منعقد ہوا جس کی صدارت صوبائی وزیر و چیئرمین کابینہ کمیٹی خواجہ سلمان رفیق نے کی.

صوبائی وزیر فنانس مجتبیٰ شجاع الرحمن،صوبائی وزیر ٹرانسپورٹ و ماس ٹرانزٹ بلال اکبر خان،صوبائی وزیر زراعت سید محمد عاشق حسین شاہ،آئی جی پنجاب ڈاکٹر عثمان انور، سپیشل سیکرٹری داخلہ فضل الرحمان، ایڈیشنل آئی جی سپیشل برانچ ذوالفقار حمید، ایڈیشنل آئی جی سی ٹی ڈی وسیم سیال،ایڈیشنل آئی جی جنوبی پنجاب، کمشنر ڈاکٹر ناصر محمود بشیر اور آر پی او کیپٹن ریٹائرڈ سجاد حسن خان، ڈپٹی کمشنر مہر شاہد زمان لک، اراکین پنجاب اسمبلی سردار احمد خان لغاری،سردار اسامہ فیاض لغاری،سردار عبد القادر خان کھوسہ اور دیگر افسران بھی شریک تھے

وزیر اعلیٰ پنجاب مریم نواز شریف کی ہدایت پر کابینہ کمیٹی نے ڈی جی خان میں محرم الحرام کے جلوس اور مجالس کے انتظامات کا جائزہ لیا۔

صوبائی وزیر و چیئرمین کابینہ کمیٹی خواجہ سلمان رفیق اور دیگر وزراء نے کہا کہ کابینہ کمیٹی پنجاب بھر کے ڈویژنل ہیڈکوارٹرز میں خود جاکر انتظامات کا جائزہ لے رہی ہے۔محرم الحرام مذہبی عقیدت و احترام اور پُرامن انداز میں گزارنے کیلئے اپنا کردار ادا کریں۔محرم الحرام کے دوران سکیورٹی کے غیر معمولی انتظامات یقینی بنائے جا رہے ہیں۔

محکمہ داخلہ کی جانب سے جاری کردہ ایس او پیز پر من و عن عملدرآمد یقینی بنایا جائے۔پنجاب بھر میں امن کمیٹیاں متحرک ہو کر مثبت کردار نبھائیں۔محکمہ داخلہ پنجاب میں قائم مرکزی کنٹرول روم صوبہ بھر سے رپوٹ لے رہا ہے۔سٹینڈنگ کیبنٹ کمیٹی کے اراکین نے کہا کہ وزیر اعلیٰ پنجاب مریم نواز شریف کا محرم الحرام پر خصوصی فوکس ہے۔امن و امان میں خلل ڈالنے والوں کے ساتھ آہنی ہاتھوں سے نمٹا جائے گا۔

پولیس کی معاونت کیلئے پاک آرمی اور رینجرز کی خدمات طلب کی گئی ہیں۔تمام مجالس اور جلوس کیلئے فول پروف انتظامات ہونے چاہئیں۔منتظمین،امن کمیٹیوں کے اراکین کے ساتھ قریبی رابطہ برقرار رکھا جائے۔فرقہ وارانہ ہم آہنگی کی فضا برقرار رکھنے کیلئے سوشل میڈیا کی بھی مانیٹرنگ کی جائے گی۔ لاؤڈ سپیکر کا غلط استعمال کرنے والوں کے خلاف بلاامتیاز کارروائی کی جائے۔مجالس اور جلوسوں کا آڈیو،ویڈیو ریکارڈ مرتب ہوگا۔

وزیر اعلیٰ مریم نواز شریف کی ہدایت پر اس مرتبہ حکومت کی طرف سے بھی سبیل اور لنگر کا انتظام ہوگاکیبنٹ کمیٹی کو محرم الحرام،کچہ علاقہ،ٹرائی بارڈر ایریا اور حساس مقامات کے حوالے سے بریفنگ بھی دی گئی۔

کمشنر ڈاکٹر ناصر محمود بشیر نے کہا کہ ڈی جی خان ڈویژن میں عاشورہ تک 4649 مجالس اور 1359 جلوس ہوں گے۔218 جلوس اور 698 مجالس کو انتہائی حساس قرار دیا گیا ہے۔ڈی جی خان ڈویژن میں محرم الحرام کے حوالے سے 111 ٹربل سپاٹس اور 34 فلیش پوائنٹس کی نشاندہی کی گئی ہے۔159 خطباء اور ذاکرین کی ضلع بندی اور 82 کی زباں بندی کی گئی ہے۔کسی بھی صورتحال سے نمٹنے کیلئے ڈویژنل اور ضلعی کنٹرول روم قائم کئے گئے ہیں۔

آر پی او کیپٹن ریٹائرڈ سجاد حسن خان نے بتایا کہ مجالس اور جلوسوں پر افسران سمیت 10125 پولیس جوان تعینات ہوں گے۔2722 مرد اور خواتین رضاکار بھی پولیس کی معاونت کریں گے۔ اجلاس میں استحکام پاکستان،،امن و امان،ملک اور قوم کی خوشحالی کیلئے خصوصی دعا بھی کی گئی۔

Leave a reply