ممتاز حیدر
چین نے انسداد دہشت گردی کے مؤقف پر پاکستان کی حمایت کا اعادہ کیا ہے۔
چینی وزیرخارجہ وانگ ای نے پاکستانی ڈپٹی وزیراعظم اور وزیرخارجہ اسحاق ڈار سے ٹیلیفون پر بات چیت کی۔ اس دوران اسحاق ڈار نے چینی ہم منصب کو پاکستان اور بھارت کے درمیان حالیہ کشیدگی کے بارے میں بریفنگ دی۔ اس گفتگو میں اسحاق ڈار نے بتایا کہ پاکستان دہشت گردی کے خلاف اپنے عزم پر پختہ ہے اور وہ خطے میں کشیدگی نہیں چاہتا، بلکہ پاکستان اس معاملے کو انتہائی سنجیدگی اور ذمہ داری سے حل کرنے کا ارادہ رکھتا ہے۔
چینی وزیر خارجہ وانگ ای نے اس بات کی تصدیق کی کہ چین خطے کی موجودہ صورتحال کا بغور جائزہ لے رہا ہے۔ انہوں نے کہا کہ دہشت گردی کے خلاف جنگ ایک عالمی ذمہ داری ہے جس میں تمام ممالک کو مشترکہ طور پر کردار ادا کرنا چاہیے۔ چین نے ہمیشہ پاکستان کے انسداد دہشت گردی کے مؤقف کی حمایت کی ہے اور وہ اس کے اس عزم میں بھرپور تعاون کرتا ہے۔وانگ ای نے مزید کہا کہ چین پاکستان کی خودمختاری اور سلامتی کے تحفظ کی مکمل حمایت کرتا ہے۔ انہوں نے یہ بھی کہا کہ پاک بھارت کشیدگی نہ صرف دونوں ممالک بلکہ پورے خطے کے امن کے لئے نقصان دہ ہے۔ چین اس کشیدگی کے حل کے لئے ایک پرامن طریقہ کار کی حمایت کرتا ہے اور دونوں ممالک کے درمیان مذاکرات کی اہمیت پر زور دیتا ہے۔
یہ گفتگو دونوں ممالک کے درمیان تعلقات میں مزید ہم آہنگی اور تعاون کو فروغ دینے کی ایک اہم قدم ہے، اور اس سے ظاہر ہوتا ہے کہ چین پاکستان کے ساتھ اپنے تعلقات کو مزید مستحکم بنانے کے لئے پرعزم ہے۔
