ڈاکٹرغلام مصطفی بڈانی
چنیوٹ (نامہ نگارحافظ حسن معاویہ) پنجاب فوڈ اتھارٹی کے ڈپٹی ڈائریکٹر آپریشنز ڈاکٹر محمد قاسم رضا کی سربراہی میں چنیوٹ شہر اور بھوانہ میں خفیہ اطلاعات پر مضر صحت اور غیر معیاری گوشت کے خلاف نتیجہ خیز کارروائیاں عمل میں لائی گئیں۔
کارروائی کے دوران بھوانہ میں ایک شخص کو رات گئے مردہ جانور کا گوشت ترسیل کرتے ہوئے رنگے ہاتھوں گرفتار کر لیا گیا، جس کے خلاف تھانہ بھوانہ میں مقدمہ درج کرا دیا گیا۔
مزید چھاپوں میں علی الصبح ایک غیر قانونی مذبح خانے سے بدبودار اور ناقص گوشت برآمد ہوا، جبکہ ایک پولٹری شاپ پر بیمار اور مطلوبہ وزن سے کم مرغیاں پائے جانے پر دو لاکھ روپے کے بھاری جرمانے عائد کیے گئے۔
پنجاب فوڈ اتھارٹی نے مجموعی طور پر 110 کلو گرام مضر صحت اور بدبودار گوشت تلف کرا دیا۔
ڈپٹی ڈائریکٹر نے شہریوں سے اپیل کی ہے کہ وہ اپنے اردگرد مشکوک خوراک تیار کرنے والوں پر کڑی نظر رکھیں اور کسی بھی شکایت کی صورت میں فوری طور پر پنجاب فوڈ اتھارٹی کو اطلاع دیں تاکہ انسانی جانوں کے تحفظ کو یقینی بنایا جا سکے۔
