وزیراعلیٰ پنجاب کا گستاخانہ خاکوں کے ردعمل میں بڑا اعلان،دل جیت لئے

وزیراعلیٰ پنجاب کا گستاخانہ خاکوں کے ردعمل میں بڑا اعلان،دل جیت لئے
باغی ٹی وی کی رپورٹ کے مطابق وزیراعلیٰ پنجاب سردار عثمان بزدارنے کہا ہے کہ نبی کریم صلی اللہ علیہ وآلہ وسلم سے ہر مسلمان کی بے حد جذباتی وابستگی ہے-اللہ کے نبیؐ سے محبت ہمارے ایمان کا لازمی حصہ ہے-ہر مسلمان اس محبت کو جان و دل سے مقدم جانتا ہے-

لاہور میں میڈیا سے گفتگو کرتے ہوئے عثمان بزدار کا کہنا تھا کہ مغرب کو یہ بات سمجھ لینی چاہیئے کہ مسلمان جان تو قربان کر سکتا ہے لیکن پیارے نبی کریم صلی اللہ علیہ وآلہ وسلم کی شان اقدس میں گستاخی ہرگز برداشت نہیں کر سکتا-کچھ عرصہ قبل ناروے میں ناہنجار کارٹونسٹ نے آزادی اظہار کے نام پر ناپاک جسارت کی-ڈنمارک اور دیگر ممالک میں مسلمانوں کے جذبات مجروح کرنے والے مکروہ اقدامات کئے گئے-فرانس میں طلبا کو زبردستی آزادی اظہار کے نام پر دل آزاری کرنے والے خاکے دکھائے گئے-یہ دل آزاری کرنے والے شر انگیز اقدامات ہیں -آزادی اظہار کے نام پر کی جانے والی مذموم حرکتیں قطعی طور پر ناقابل برداشت ہیں -ہم ایسے گستاخانہ خاکوں کی شدید مذمت کرتے ہیں -اقوام متحدہ سے مطالبہ کرتے ہیں کہ دنیا بھر میں نبی کریم صلی اللہ علیہ وآلہ وسلم اور دیگر انبیاء کرام کے بارے میں گستاخانہ اور مذموم حرکتیں کرنے پر پابندی عائد کی جائے-اس مذموم حرکت پر میرا دل بہت رنجیدہ ہے-

وزیراعلیٰ پنجاب عثمان بزدار کا مزید کہنا تھا کہ اگر ہولوکاسٹ پر بات کرنے سے کسی کی دل شکنی یا جذبات مجروح ہوتے ہیں تو پونے دو ارب مسلمانوں کے جذبات اور احساسات کو بے دردی سے بار بارکیوں مجروح کیا جا رہا ہے-میں مطالبہ کرتا ہوں کہ او آئی سی اور دیگر ادارے بھی اس پربھرپور رد عمل کا اظہار کریں تاکہ کسی شرپسند کو دوبارہ یہ حرکت کرنے کی جرأت نہ ہو-

وزیراعلیٰ پنجاب عثمان بزدار کا مزید کہنا تھا کہ فرانس میں ہونے والی اس مذموم حرکت اور فرانسیسی صدر کے قابل مذمت بیان کا بھرپور جواب دینے کیلئے ہم نے فیصلہ کیا ہے کہ ہر سال ربیع الاول میں ہفتہ شان رحمت اللعالمینؐ سرکاری سطح پر منایا جائے گا-اس ہفتے حضرت محمد صلی اللہ علیہ وآلہ وسلم کی شان اقدس کو بیان کرنے کیلئے مختلف تقریبات ہوں گی-تقریبات کا آغازالحمراء لاہور میں نعتیہ مشاعرے سے ہوگا جہاں نعت گو شاعر نبی کریم ؐ کی شان میں ہدیہ عقیدت پیش کریں گے-لاہور میں محفل سماع بھی منعقد کی جائے گی، جس میں ملک کے نامور قوال شرکت کریں گے- پنجاب میں پہلی عالمی علماء و مشائخ کانفرنس منعقد ہوگی جہاں بین ا لاقوامی شہرت یافتہ علماء اور مشائخ مقالہ جات پیش کریں گے-

وزیراعلیٰ عثمان بزدار نے پنجاب میں 50 کروڑ روپے کے ابتدائی فنڈ سے رحمت اللعالمین سکالرشپ کے اجراء کااعلان کیا اور کہا کہ 25 کروڑ روپے کی رقم سے پوزیشن ہولڈر طلبہ کو وظائف دئیے جائیں گے-صوبہ بھر میں میٹرک پاس کرنے والے غریب اور نادار طلبہ کو مزید پڑھائی کیلئے 25 کروڑ روپے کے رحمت اللعالمین سکالرشپ بھی دیئے جائیں گے-ان طلبہ اور طالبات کی فیس اور رہائش کیلئے مالی معاونت کی جائے گی- ہر سال ربیع الاول میں 50 کروڑ کے ابتدائی فنڈ میں خاطر خواہ اضافہ کیا جائے گا -محکمہ ہائر ایجوکیشن کے زیر اہتمام سکالرز کیلئے یونیورسٹیوں میں رحمت اللعالمین چیئرز قائم کی جا رہی ہیں -رحمت اللعالمین چیئرز پنجاب کے ڈویژنل ہیڈ کوارٹرز کی یونیورسٹیوں میں قائم کی جائیں گی- سکالرز کواسلامی دنیا کے بہترین اداروں میں نبی کریم ؐ کی سیرت پر ریسرچ کیلئے سکالر شپ دئیے جائیں گے-

وزیراعلیٰ پنجاب عثمان بزدار کا مزید کہنا تھا کہ ہر سال ربیع الاول میں نعتیہ مشاعرے ہوں گے اور ملک بھر سے نامور اور جید شعرا کو مدعو کیا جائے گا- اندرون اور بیرون ممالک سے نامور سکالرز اور محققین کو مدعو کیا جائے گا جو سیرت مبارکؐ پر مقالہ جات پیش کریں گے- صوبہ، ڈویژن، ضلع،یونیورسٹیز اور بورڈز کی سطح پر سیرت النبی ؐپر تقریری مقابلے کرائے جائیں گے- جیتنے والے طلبا و طالبات کو اسناد اور نقد انعامات دئیے جائیں گے- سیرت النبی ؐ کو اجاگر کرنے کیلئے اسلامی خطاطی کے مقابلے میں ملک بھر سے خطاط حضرات کو مدعو کیا جائے گا-مقابلے میں بہترین خطاط کو اسناد اور نقد انعامات سے نوازا جائے گا-محسن انسانیت حضرت محمد ؐ کی حیات مبارکہ پر مختصر دستاویزی فلمیں بنائی جائیں گی- بہترین ڈاکومنٹری کو ٹی وی چینلز اور سوشل میڈیا پر انگلش اور فرنچ سب ٹائٹلز کے ساتھ نشر کیا جائے گا-مقابلے کے ونر پروڈیوسر کو اسناد اور نقد انعام دیا جائے گا-ہفتہ رحمت اللعالمینؐ کے دوران صوبائی، ڈویژنل اور ضلعی سطح پر نعت خوانی اور قوالی کی محافل کا اہتمام کیا جائے گا-یہ مسئلہ پوری امت مسلمہ کا ہے-رحمت اللعالمینؐ کی شان بیان کرنا ہمارے ایمان کاحصہ ہے-رحمت اللعالمینؐ سکالر شپ میں ہر سال اضافہ کیاجائے گا-

فرانس کے اسلام مخالف بیان پر پاکستان کا بڑا فیصلہ، وزیر خارجہ نے بتا دیا

فرانس کی اسلام دشمنی،پنجاب اور کے پی اسمبلی میں قرارداد مذمت جمع

پاکستان سمیت تمام مسلمان ممالک فرانس کا بائیکاٹ کریں،چودھری پرویز الہیٰ کا بڑا مطالبہ

پاکستان پہلا ملک جس نے فرانسیسی سفیرکو طلب کیا، گساخانہ خاکوں کا مسئلہ کہاں کہاں اٹھائیں گے، طاہر اشرفی نے بتا دیا

گستاخی کے مرتکب افراد کے خلاف کیا کاروائی کی جائے؟ سراج الحق کا سینیٹ میں بڑا مطالبہ

فرانس سے تعلقات منقطع کرنے کی ایک اور درخواست پرعدالت نے فیصلہ سنا دیا

وزیراعلیٰ پنجاب عثمان بزدار کا مزید کہنا تھا کہ ہفتہ شان رحمت اللعالمینؐ ہر سال مذہبی جوش و خروش، عقیدت اور احترام سے منایا جائے گا- پوری کمیونٹی کو موبلائز کیاجائے گا- ہفتہ شان رحمت اللعالمین ؐکی تقریبات کے لئے کمیٹیاں تشکیل دی جائیں گی- وزارتی کمیٹی میں صوبائی وزیر اوقاف پیر سید سعید الحسن شاہ، معاون خصوصی اطلاعات ڈاکٹر فردوس عاشق اعوان او ردیگر شامل ہوں گے- سیکرٹریٹ کی سطح کی بھی کمیٹی تشکیل دی جائے گی-تمام تقریبات کاشیڈول جاری کیاجائے گا-اگلے ہفتے سے ہفتہ شان رحمت اللعالمینؐ کی تقریبات کا باقاعدہ آغاز ہوگا-تمام انتظامات کو خود مانیٹر کروں گا-صحافیوں کو صحت انصاف کارڈ کے حوالے سے جلد خوشخبری دیں گے-میری ملاقات اراکین اسمبلی سے ہوتی رہتی ہے-ریاست کے خلاف کوئی بھی اقدام نا قابل برداشت ہے-ہم سب پاکستانی ہیں،پاکستان ہے تو ہم ہیں -گزشتہ روز بھی رکن پنجاب اسمبلی اظہر عباس چانڈیا سے ملاقات ہوئی-میں سب کو ساتھ لیکر چلتا ہوں –