لاہور: ڈی جی فوڈ اتھارٹی کی ٹیم کے ہمراہ کاروائی،کولڈ اسٹور سے تین سال پرانا 7 ہزار کلو گوشت برآمد

0
67

لاہور: ڈی جی فوڈ اتھارٹی مدثر ریاض ملک کی مافیاز کے خلاف تیزی سے کاروائیاں جاری ہیں،لاہور میں کولڈ اسٹور سے تین سال پرانا 7 ہزار کلو گوشت برآمد کر لیا-

باغی ٹی وی : میڈیا ذرائع کے مطابق ڈی جی فوڈ اتھارٹی نے ٹیم کے ساتھ ایک ہی دن میں لاہور اور سرگودھا میں میراتھن کارروائیاں کیں لاہور میں ملتان روڈ پر کولڈ اسٹور سے تین سال پرانے امپورٹڈ سری پائے، کھد، زبان اور باسی گوشت برآمد کیا گیا۔


فوڈ اتھارٹی ذرائع کے مطابق ایک ہوٹل سے باسی گوشت ملنے پر ڈی جی فوڈ اتھارٹی نے سپلائر کا پتہ لگا یا تو کولڈ اسٹور کا سراغ ملا۔

ڈی جی فوڈ اتھارٹی مدثر ریاض ملک نےبتایا کہ کولڈ اسٹور میں مختلف ہمسایہ ممالک سےدرآمد شدہ حلال حرام کی تفریق کے بغیر ایکسپائر گوشت برآمد ہوا۔ تمام گوشت قانونی کاروائی مکمل کرنے کے بعد پیمکو بھٹی میں جلا کر تلف کر دیا گیا۔


انہوں نے بتایا کہ کولڈ اسٹور مالک کے خلاف مقدمہ درج کرلیا گیا اور اس کے تمام خریداروں کی تفصیل حاصل کی جا رہی ہے۔


دوسری جانب سرگودھا میں گرائنڈنگ فیکٹری سے 800 کلو ملاوٹی مرچیں،1850 کلو دال مونگ، 1700 کلو دال مٹری 200 کلو مرچیں، 500 کلو ٹوٹے چاول اور 800 کلو بیسن ضبط کرلیا گیا۔


کارخانے میں گھوڑوں کی خوراک کم معیار مٹری دال، چاول اور دال مونگ مکس کر کے ملاوٹی بیسن تیار کیا جارہا تھا۔ تیار مرچوں اور بیسن کو قوانین کے خلاف کھلا بغیر ڈھانپے زمین پر رکھا پایا گیا جس کے بعد فیکٹری بند کر دی گئی۔

ڈی جی فوڈ اتھارٹی مدثر ریاض ملک نے صوبہ بھر کے کولڈ اسٹورز چیک کرنے کا حکم دیتے ہوئے کہا ہے کہ ملاوٹ مافیا کے خاتمے کے لیے کسی حد تک بھی جانا پڑا تو گریز نہیں کروں گا، صوبہ بھر میں امپورٹڈ گوشت سٹور کرنے والے سٹورز کی مکمل چیکنگ کی جائے گی۔


قبل ازیں سوشل میڈیا ویب سائٹ ٹوئٹر پر اپنی ٹوئٹ میں ڈی جی فوڈ اتھارٹی نے کہا تھا کہ پنجاب فوڈ اتھارٹی سے متعلقہ شکایات کے لئے مجھے ٹوئٹر پر براہ راست میسج بھیج سکتے ہیں۔صوبہ میں ملاوٹ مافیا سمیت تمام غیر قانونی کاموں کو سختی سے روکیں گے،شکایات کا ازالہ کیا جائے گا۔اس کے ساتھ عوام اپنی شکایات کی ٹول فری ہیلپ لائن 80500 0800 پر بھی کرسکتے ہیں۔

Leave a reply