کمیٹی کسی بھی معاملے کا نوٹس لے سکتی ہے. چیئرمین پبلک اکاؤنٹس کمیٹی

چیئرمین نورعالم خان کی زیر صدارت آج ایک بار پھر پبلک اکاونٹس کمیٹی کا اجلاس منعقد ہوا جس میں نیب آڈٹ اعتراضات اور ریکوریز سمیت مختلف معاملات زیرغور رہے.

جبکہ کمیٹی کی جانب سےطلبی کے باوجود سابق چیئرمین نیب اور سابق ڈی جی نیب اجلاس میں تاحال حاضر نہ ہوئے۔

سیکریٹری خزانہ کے گزشتہ روز پی اے سی اجلاس میں نہ آنے پر چیئرمین نور عالم خان نے کی تنبیہ کی کہ آپ گزشتہ روز وزیر اعظم سے ملاقات میں تھے لہذا اب آپ پی اے سی کو سنجیدہ لیں۔

سینیٹر ہلال الرحمان کی درخواست پر سینیٹر شبلی فراز نے اعتراض کیا کہ یہ کیا طریقہ کار ہے کہ درخواست فوری آئے اور پھر کارروائی بھی شروع ہوجائے ۔

شبلی فراز کا مزید کہنا تھا کہ: درخواست آئی تو اسے پہلے ارکان کو دیا جائے وہ پڑھیں پھر بات کریں، رولز بتائیں کہ کیسے ایک پبلک پٹیشن ارکان کو دیئے بغیر سنی جائے۔

شبلی فراز کو جواب دیتے ہوئے چیئرمین پی اے سی نور عالم خان نے کہا کہ پبلک اکاؤنٹس کمیٹی کو رولز اجازت دیتے ہیں کہ وہ پبلک پٹیشن لے سکتی ہے۔اور کمیٹی کسی بھی ایسے معاملے کا نوٹس لے سکتی ہے جس میں پیسہ اور کرپشن کا معاملہ ہو۔

نور عالم نے شبلی فراز کو کہا کہ چیخیں مارنے سے کچھ نہیں ہوتا، بطور چیئرمین کچھ اختیار ہے.

شبلی فراز نے اس پر جواب دیا کہ: آپ سے رولز کا پوچھنا جرم ہے تو معافی مانگتا ہوں.

سینیٹر شبلی فراز نے کہا: یہاں سیاسی بیان بازی نہ کی جائے ایجنڈے پر رہا جائے، اگر چار سال میں کرپشن ہوئی ہے تو پچھلے 3 سال میں کیا ہوتا رہا.

شبلی فراز نے کہا کہ: میں کرپشن کے خلاف کھڑا ہوں اس پر منحرف رکن پی ٹی آئی احمد حسین دیہڑ نے کہا: چار سال میں جتنی کرپشن ہوئی کبھی نہیں ہوئی، ‏پچھلے چندسال میں مافیا کرپشن کررہا تھا اور چھپا رہا تھا.

سینیٹر ہلال الرحمان نے کمیٹی ممبران کو بتایا کہ: وفاقی حکومت نے 76کروڑ روپے سابق فاٹا کے اضلاع کے لیے دیئے، مہمند، خیبر، باجوڑ وغیرہ کے لیے 2روزمیں کروڑوں روپے جاری کردیئے گئے، یہ رقم بی ایس سی کے ایک طالبعلم کے اکاونٹ میں منتقل کی گئی، جب کام ذرا سا بھی نہیں ہوا تو ٹھیکیداروں کو رقم کیسے منتقل ہوگئی؟

چیئرمین نور عالم نے کہا کہ: نیب اور ایف آئی اے ایک ماہ میں تحقیقات مکمل کریں، آڈیئٹر جنرل بھی ایک ماہ میں ایس ڈی جیز میں ہوئی کرپشن پر رپورٹ مکمل کریں، جب تک تحقیقات مکمل نہیں ہوں گی خیبرپختونخوامیں ایس ڈی جیز کی رقم منجمد رہے گی.