fbpx

کامن ویلتھ گیمز، ریسلر انعام بٹ نے چاندی، عنایت اللہ نے کانسی کا تمغہ جیت لیا

برمنگھم: کامن ویلتھ گیمز میں پاکستانی پہلوانوں انعام بٹ نے چاندی اور عنایت اللہ نے کانسی کا تمغہ جیت لیا۔برمنگھم میں جاری کامن ویلتھ گیمز کے فیصلہ کن معرکے میں بھارت کے دیپک پونیا نے پاکستانی ریسلر انعام بٹ کو 85 کلوگرام فری سٹائل کیٹگری میں صفر کے مقابلے میں 3 پوائنٹس سے ہراکر گولڈ میڈل اپنے نام کیا۔

گوجرانوالہ کے پہلوان انعام بٹ نے 86 کلو گرام فری سٹائل کیٹگری میں آسٹریلیا کے جیڈن لارنس کو شکست دیکر فائنل فور میں جگہ بنائی، سیمی فائنل میں انہوں نے جنوبی افریقہ کے ایڈورڈ لیسنگ کو شکست دیکر فیصلہ کن معرکے میں رسائی حاصل کی تھی۔

قبل ازیں انعام بٹ نے سکاٹ لینڈ کے پہلوان کو شکست دیکر کوارٹر فائنل کے لیے کوالیفائی کیا تھا، انعام پہلوان نے گیارہ پوائنٹ سے کشتی جیتی۔

دوسری طرف کامن ویلتھ گیمز 2022ء میں پاکستان کو ایک اور میڈل مل گیا، 65 کلو گرام کیٹیگری میں ریسلر عنایت اللہ نے برانز میڈل جیت لیا۔برطانیہ میں جاری کامن ویلتھ گیمز 2022ء میں پاکستانی ریسلر عنایت اللہ 65 کلو گرام کیٹیگری کے فائنل میں شکست کھا گئے تھے تاہم انہوں نے تیسری پوزیشن کا میچ جیت کر برانز میڈل حاصل کرلیا۔

عنایت اللہ نے میچ میں اسکاٹ لینڈ کے ریسلر کو 0-10 کے بڑے مارجن سے باآسانی شکست دی۔اس سے قبل نوح بٹ ویٹ لفٹنگ میں سونے کا جبکہ جوڈو میں شاہ حسین شاہ کانسی کا تمغہ جیت چکے ہیں۔