لاس اینجلس: فیڈرل ایوی ایشن ایڈمنسٹریشن اور قانون نافذ کرنے والے ادارے اس واقعے کی تحقیقات کر رہے ہیں جس میں پیر کے روز اٹلانٹا سے لاس اینجلس جانے والی ڈیلٹا ایئر لائنز کی ایک پرواز میں ایک مسافر نے متعدد افراد پر حملہ کیا۔
ڈیلٹا فلائٹ 501 کے لاس اینجلس انٹرنیشنل ایئرپورٹ پر اترنے کے فوراً بعد عملے نے رپورٹ کیا کہ ایک بالغ مرد مسافر کو قابو میں کیا گیا تھا کیونکہ اس نے ایک دوسرے مسافر کو کاٹ لیا اور دیگر افراد کو مارا پیٹا۔ لاس اینجلس فائر ڈیپارٹمنٹ اور ٹرانسپورٹیشن سیکیورٹی ایڈمنسٹریشن کے مطابق، اس واقعے کے بعد طبی امداد فراہم کی گئی۔ریسکیو ٹیم نے مشتبہ شخص کو ہسپتال لے جا کر اس کی نفسیاتی جانچ کی اور بعد ازاں زخمی مسافر کا بھی طبی معائنہ کیا۔
ڈیلٹا ایئر لائنز کی ترجمان سمانتھا مور فیکٹو کے مطابق، "ڈیلٹا غیر مہذب اور جارحانہ رویے کے خلاف زیرو ٹالرینس کی پالیسی رکھتی ہے اور اس سلسلے میں قانون نافذ کرنے والے اداروں کے ساتھ مکمل تعاون کرے گی۔”یہ واضح نہیں ہو سکا کہ مذکورہ مسافر کو ہسپتال لے جانے کے بعد کیا کارروائی کی گئی، تاہم اسے مجرمانہ یا سول سزاؤں کا سامنا کرنا پڑ سکتا ہے۔
فیڈرل ایوی ایشن ایڈمنسٹریشن کے مطابق، 2024 میں 2,100 سے زائد مسافروں کے غیر مہذب رویے کے واقعات رپورٹ کیے گئے، جبکہ رواں سال کے آغاز میں ہی 300 سے زائد ایسے کیسز ریکارڈ ہو چکے ہیں۔ایف اے اے کے بیان کے مطابق، کسی بھی مسافر کی جانب سے ایئر لائن کے عملے پر حملہ، دھمکی، خوفزدہ کرنا، یا رکاوٹ ڈالنے کی صورت میں قانونی کارروائی کی جا سکتی ہے، اور ایسے افراد پر 37,000 ڈالر تک جرمانہ عائد کیا جا سکتا ہے۔2021 میں، جب کورونا وائرس کی وبا اپنے عروج پر تھی، غیر مہذب رویے کے 6,000 سے زائد واقعات درج کیے گئے تھے، جو کہ ایک ریکارڈ سطح ہے۔
یہ واقعہ ایک بار پھر فضائی سفر میں بڑھتی ہوئی بدتمیزی اور سیکیورٹی کے خدشات کو اجاگر کرتا ہے، اور قانون نافذ کرنے والے ادارے اس طرح کے واقعات کے سدباب کے لیے مزید سخت اقدامات کر رہے ہیں۔
