ڈیرہ غازی خان (نیوز رپورٹر شاہد خان) حکومت پنجاب کی ہدایت پر تجاوزات آپریشن کے بعد کشادہ ہونے والے مقامات کی تزئین و آرائش کی جائے گی۔ ڈیرہ غازی خان ڈویژن کے شہروں کو خوبصورت بنانے کے لیے سکیمیں طلب کر لی گئی ہیں۔ اس حوالے سے کمشنر اشفاق احمد چوہدری کی زیر صدارت دوسرے روز بھی ویڈیو لنک اجلاس منعقد ہوا، جس میں ڈپٹی کمشنرز نے بریفنگ دی۔
ابتدائی طور پر 18 کروڑ روپے کی 92 سکیمیں تجویز کی گئی ہیں۔ کمشنر نے کہا کہ تجاوزات آپریشن والے علاقوں کو فوکس کیا جائے۔ پارکس، چوکوں، گرین بیلٹس، میڈینز اور پاتھ ویز کو بہتر بنایا جائے۔ اسٹریٹ لائٹس کو فعال کرایا جائے اور کھیل کے گراؤنڈز کو آباد کیا جائے۔
کمشنر اشفاق احمد چوہدری نے ڈپٹی کمشنرز کو معاملات کی نگرانی کرنے کی ہدایت کی۔ انہوں نے کہا کہ چیف سیکرٹری پنجاب زاہد اختر زمان کی ہدایت پر سکیموں کی منظوری کے بعد فنڈز مختص کیے جائیں گے۔
