مسلم لیگ ن ڈیرہ غازی خان کا خصوصی اجلاس، بلدیاتی الیکشن کے لیے اہم فیصلے

کوٹ چھٹہ (باغی ٹی وی، تحصیل رپورٹر) مسلم لیگ ن ضلع ڈیرہ غازی خان کا خصوصی اجلاس ضلعی صدر میر محمد مرزا خان تالپور کی زیر صدارت منعقد ہوا۔ اجلاس میں مسلم لیگ ن ڈیرہ غازی خان کی تمام ونگز کے عہدے داروں نے شرکت کی اور آئندہ متوقع بلدیاتی انتخابات اور ضلعی کمیٹیوں کے حوالے سے تفصیلی مشاورت کی گئی۔

اجلاس میں سابقہ 2024 کے جنرل الیکشن میں پارٹی پالیسی کی مخالفت کرنے والے عہدے داروں کے خلاف کارروائی کی سفارشات پیش کی گئیں، جن میں سابق سٹی صدر سید عبدالعلیم شاہ اور حلقہ پی پی 291 کے صدر ایوب خان کچیلا کے خلاف کارروائی کی سفارش بھی شامل ہے۔ اس موقع پر بلدیاتی الیکشن اور ضلعی کمیٹیوں میں فعال اور سینئر مسلم لیگی رہنماؤں کے انتخاب کا فیصلہ کیا گیا اور حتمی فیصلے کا اختیار ڈویژنل صدر مسلم لیگ ن ڈیرہ غازی خان مہر اعجاز احمد اچلانا اور صوبہ پنجاب کے مسلم لیگ ن جنرل سیکرٹری سردار اویس احمد خان لغاری کو دیا گیا۔

اجلاس میں سینئر نائب صدر مسلم لیگ ن ڈیرہ غازی خان ڈویژن میاں سلطان محمود ڈاہا، جنرل سیکرٹری ملک غلام مصطفیٰ کھنڈوعہ، نواب طارق علی کاکڑ، امجد سردار، اللہ نواز خان گوپانگ، سید احسان عباس گیلانی، امتیاز حسین جھجھ، ملک غلام یاسین، اسلم مہتر اور دیگر مسلم لیگی رہنما شریک ہوئے۔