ڈیرہ غازی خان:ریجنل پولیس آفیسرکا اردل روم کا انعقاد، 09 اپیلوں کی سماعت

ڈیرہ غازیخان (باغی ٹی وی نیوز رپورٹر شاہد خان)ریجنل پولیس آفیسر (آر پی او) کیپٹن (ر) سجاد حسن خان نے ریجنل پولیس آفس ڈیرہ غازیخان میں اردل روم کا انعقاد کیا، جہاں انہوں نے 09 اپیلوں اور شوکاز نوٹسز کی سماعت کی۔ اس اجلاس کا مقصد محکمہ پولیس کی کارکردگی کو بہتر بنانا اور افسران و اہلکاران کو سزاء و جزاء کے اصولوں کے تحت کام کرنے کی ترغیب دینا تھا۔

تفصیلات کے مطابق کیپٹن (ر) سجاد حسن خان نے اردل روم میں پولیس افسران اور اہلکاران کی جانب سے دائر کی گئی اپیلوں پر تفصیلی غور و خوض کیا۔ ان اپیلوں میں پولیس اہلکاروں کو دی گئی مختلف سزاؤں کے خلاف 09 اپیلیں شامل تھیں۔ سماعت کے دوران آر پی او نے تسلی بخش جواب پیش کرنے پر 03 اپیلوں میں دی گئی سزاؤں کو ختم کرنے کا فیصلہ کیا، جبکہ 06 اپیلوں میں تسلی بخش جواب نہ ملنے اور اختیارات کے ناجائز استعمال پر سزاؤں کو برقرار رکھنے کا حکم دیا۔

شوکاز نوٹسز کی سماعت کے دوران آر پی او نے متعلقہ افسران کے خلاف محکمانہ انکوائری کے احکامات بھی جاری کیے تاکہ مزید تحقیقات کی جا سکیں اور انصاف کے تقاضے پورے کیے جا سکیں۔

کیپٹن (ر) سجاد حسن خان نے اس موقع پر کہا کہ محکمہ پولیس کے تمام افسران اور اہلکاران کو شہریوں کی حفاظت اور جرائم کے خاتمے کے لیے جانفشانی اور ایمانداری سے کام کرنا ہوگا۔ انہوں نے زور دیا کہ میرٹ پر انصاف کی فراہمی کو یقینی بنایا جائے اور کسی کو بھی اپنے اختیارات سے تجاوز کرنے کی اجازت نہ دی جائے۔ آر پی او نے مزید کہا کہ محکمہ میں سزاء اور جزاء کا عمل ہر صورت جاری رکھا جائے گا تاکہ افسران کی کارکردگی بہتر ہو اور محکمہ پولیس میں شفافیت کو فروغ دیا جا سکے۔

آر پی او نے یہ بھی واضح کیا کہ محکمہ پولیس کی بہتری کے لیے سخت اقدامات اٹھائے جا رہے ہیں اور اس عمل کو مستقل بنیادوں پر جاری رکھا جائے گا۔ افسران کو ہدایت کی گئی کہ وہ اپنے فرائض دیانتداری سے انجام دیں اور عوامی شکایات کا بروقت اور منصفانہ ازالہ کریں۔