اسلام آباد:ڈیکسا میتھازون خطرناک، کورونا مریض خود سے نہ لیں: طبی ماہرین نے خبردارکردیا ،اطلاعات کے مطابق طبی ماہرین نے خبردار کیا ہے کہ کورونا وائرس کے مرض میں ڈیکسا میتھازون نامی دوا صرف ڈاکٹر کے مشورے سے استعمال کی جائے۔
ماہرین کا کہنا ہے کہ یہ اسٹیرائیڈ ہے اور اسے وینٹی لیٹر پر موجود مریض کو یا بیماری کی شدت بڑھنے پر جان بچانے کے لیے دیا جاتا ہے، اس دوا کے غلط استعمال سے انسانی صحت کو سنگین خطرات لاحق ہوسکتے ہیں۔
برطانیہ میں کرونا کے علاج کیلئے ڈیکسا میتھازون نامی دوا کا تجربہ کامیاب رہا تاہم یہ عام دوا نہیں بلکہ اسٹیرائیڈ ہے اور مرض بگڑنے کی صورت میں صرف جان بچانے کے لیے استعمال کرائی جاتی ہے۔
طبی ماہرین نے اسی لئے خبردار کیا ہے کہ پاکستان میں اس کا استعمال صرف ڈاکٹر کے مشورے سے کیا جائے کیونکہ اس کے غلط استعمال سے انسانی صحت کو ناقابلِ تلافی نقصان پہنچ سکتا ہے۔
اس حوالے سے وفاقی حکومت کو تجویز دی گئی ہے کہ ڈیکسا میتھازون کو طبی ماہرین کے مشورے کے بعد ہی کرونا وائرس کے مرض میں استعمال کرنے کی اجازت دی جائے۔
پاکستان میڈیکل ایسوسی ایشن نے وفاقی حکومت سے درخواست کی ہے کہ کرونا کے علاج کے حوالے سے جن دواؤں کے نام سامنے آ رہے ہیں، ان کے بارے میں جینیاتی نام سمیت ہر طرح کی معلومات عوام کو فراہم کی جائیں۔
