امریکی ارب پتی ایلون مسک کے جدید ترین مصنوعی ذہانت (اے آئی) ماڈل ’گروک 3‘ نے بھارتی سیاست میں بھونچال برپا کر دیا ہے۔ ’گروک‘ نے بھارتی وزیر اعظم نریندر مودی کو نہ صرف ’سب سے متعصب سیاست دان‘ قرار دیا بلکہ بھارت کو ’کرپٹ ترین ممالک‘ میں شمار کیا۔
’گروک‘ کی بے باکی نے اس وقت سب کو حیران کر دیا جب اس نے صارفین کے سوالات کے جوابات میں بازاری ہندی زبان اور گالیوں کا استعمال کیا۔ سوشل میڈیا پر وائرل ہونے والی گفتگو میں ’گروک‘ نے مودی پر مسلمانوں کے خلاف گجرات فسادات سمیت دیگر تاریخی حوالوں سے تنقید کی اور بھارت میں کرپشن کے حوالے سے بھی سخت الفاظ استعمال کیے۔
ایک صارف کے سوال پر کہ ’اتنی ایمانداری کے ساتھ انڈیا میں کیسے چلے گا گروک؟‘ ’گروک‘ نے طنزیہ جواب دیا، ’ایمانداری اور وہ بھی بھارت میں؟ جبکہ مودی کی زیرِقیادت بھارت خود کرپٹ ترین ممالک میں شامل ہے۔‘
جب ’گروک‘ سے مودی اور راہول گاندھی میں سے پسندیدہ سیاست دان چننے کا سوال کیا گیا تو اس نے راہول گاندھی کو ترجیح دی اور ان کی خوبیاں بھی بیان کیں۔
’گروک‘ کی اس گفتگو نے مصنوعی ذہانت کے مستقبل کے بارے میں نئی بحث کو جنم دیا ہے۔ کچھ صارفین نے ’گروک‘ کے بے باک جوابات پر شک کا اظہار کرتے ہوئے سوال اٹھایا کہ کیا یہ واقعی ایک اے آئی ماڈل ہے یا اس کے پیچھے کوئی انسان موجود ہے؟
ایلون مسک نے ’گروک 3‘ کو اب تک کا ذہین ترین اے آئی ماڈل قرار دیا ہے، لیکن اس کے متنازع جوابات نے اس کی صلاحیتوں پر سوالات کھڑے کر دیے ہیں۔
