پاکستانی تمغہ امتیاز اداکارہ مہوش حیات نے وفاقی وزیر تعلیم شفقت محمود سے امتحانات منسوخ کرنے کی درخواست کردی ہے۔
باغی ٹی وی :واضح رہے کہ وفاقی وزیرِ تعلیم شفقت محمود نے حال ہی میں اپنے بیان میں کہا تھا کہ اے لیول، او لیول، اے ایس، آئی جی سی ایس ای کے امتحانات شیڈول کے مطابق ہوں گے جبکہ نویں سے بارہویں جماعت کے امتحانات نئی تاریخوں کے تحت ہوں گے، امتحانات کی نئی تاریخوں کا اعلان متعلقہ بورڈ کریں گے۔
شفقت محمود نے کہا تھا کہ امتحانات کا نیا شیڈول مدِنظر رکھتے ہوئے یونیورسٹیز میں داخلے کئے جائیں گے، متاثرہ اضلاع کی یونیورسٹیز میں آن لائن کلاسیں جاری رہیں گی 8 فیصد سے کم کیسز والے اضلاع میں یونیورسٹیاں کھول دی جائیں گی۔
اُن کا مزید کہنا تھا کہ کورونا وائرس کے پھیلاؤ کے خدشے کے پیشِ نظر حکومت نے ملک بھر میں پہلی سے آٹھویں جماعت تک اسکول عید الفطر تک بند رہیں گے۔
وفاقی وزیر تعلیم کے اس بیان کے بعد طلبا نے مطالبہ کیا تھا کہ امتحانات کینسل کئے جائیں کیونکہ کورونا وبا کی وجہ سے اسکولز ، کالجز بند ہونے کی وجہ سے ان کا سلیبس مکمل نہیں ہوا ہے جس کے بعد شوبز شخصیات بھی طلبہ کی حمایت میں سامنے آئیں اور ملک میں بڑھتے کورونا کی شرح کے پیش نظر حکومت سے امتحانات کینسل کرنے کا مطالبہ کیا جن میں اب مہوش حیات بھی شامل ہوگئی ہیں-
It is wrong that students are being forced to take exams. Not only is it dangerous with the 3rd wave taking hold but is unfair when education has been so disrupted! I humbly request @Shafqat_Mahmood to cancel exams this year as other countries have done.#cancelexamspakistan2021
— Mehwish Hayat TI (@MehwishHayat) April 24, 2021
اداکارہ نے اپنی ٹوئٹ میں وزیر تعلیم کو ٹیگ کرتے ہوئے کہا ہے کہ امتحانات کے لیے طلبہ کے ساتھ زبردستی کرنا غلط ہے۔ یہ ناصرف کورونا کی تیسری لہر میں خطرناک ثابت ہوگا بلکہ منتشرتعلیمی ماحول میں ناانصافی بھی ہوگی۔
انہوں نے وفاقی وزیر تعلیم شفقت محمود سے اپیل کی کہ باقی ممالک کی طرح پاکستان میں بھی اس سال امتحانات منسوخ کیے جائیں۔
یاد رہے کہ اس سے پہلے گلوکارعاصم اظہر اور وقار ذکاء ،اداکار فیروز خان ،اداکار آغا علی بھی حکومت سے امتحانات نہ لینے کا مطالبہ کر چکے ہیں۔