فرار فلسطینی قیدیوں کی تلاش،اسرائیل نے مقبوضہ مغربی کنارے میں فوج داخل کردی

0
29

فرار فلسطینی قیدیوں کی تلاش اسرائیل نے مقبوضہ مغربی کنارے میں فوج داخل کردی ہے-

باغی ٹی وی : غیر ملکی میڈیا کے مطابق اسرائیلی جنگی بٹالینز مقبوضہ مغربی کنارے میں داخل ہوئی ہیں اسرائیلی فضائیہ کی جانب سے بھی فضائی خلاف ورزیوں کا سلسلہ جاری ہےاسرائیلی آرمی چیف نے دعویٰ کیا ہے کہ یہ کارروائی اسرائیلی جیل سے فرار افراد کو پکڑنے کے لیے کی جا رہی ہے۔

واضح رہے کہ اسرائیل کے شمال میں واقع شہر بیسان کی جیل سے کڑے پہرے میں 6 فلسطینی قیدی فرار ہونے میں کامیاب ہو گئے تھے۔

رپورٹ کے مطابق یہ تمام فلسطینی ایک سرنگ کے راستے فرار ہوئے جو انہوں نے خود کھودی تھی فلسطینی قیدیوں کی جانب سے کھودی گئی سرنگ کی لمبائی درجنوں میٹر تک جا پہنچتی ہے۔ سرنگ کے دہانے کا انکشاف جیل کی بیرونی دیوار کے باہر چند میٹر کے فاصلے پر ہوا۔

اسرائیلی اخبار کے مطابق ابتدائی معلومات میں بتایا گیا تھا کہ فرار ہونے والے تمام 6 قیدیوں کا تعلق مغربی کنارے میں جنین سے ہے اور وہ ممکنہ طور پر مغربی کنارے کے شمال میں داخل ہونے میں کامیاب ہو چکے ہوں گے۔

اسرائیلی پولیس کا کہنا ہے کہ انٹیلی جنس سروسز پولیس کے ایک بڑے آپریشن میں شامل ہیں تاکہ ان افراد کو تلاش کیا جا سکے۔ پولیس نے بتایا کہ سرچ آپریشن میں ڈرون اور ہیلی کاپٹر بھی استعمال کیے جا رہے ہیں۔

Leave a reply