فیٹف شرائط کی پیش رفت کے سلسلے میں ایف بی آر کی رئیل اسٹیٹ ایسوسی ایشنزسے ملاقات

ملک بھر کی رئیل اسٹیٹ ایسوسی ایشنز کے نمائیندگان نے ایف بی آر ہیڈکوارٹر میں منعقد ہونے والی میٹنگ میں شرکت کی۔میٹنگ کی صدارت چئیرمین ایف بی آر ڈاکٹر محمد اشفاق احمد نے کی۔ ڈائیریکٹر جنرل ڈی این ایف بی پی محمد اقبال بھی میٹنگ میں موجود تھے۔میٹنگ کے دیگر شرکاء میں اعجاز خان چئیرمین ، سردار طاہر صدر فیڈریشن آف رئیل اسٹیٹ پاکستان اور تمام صوبوں سے آئے رئیل اسٹیٹ ایسوسی ایشنز کے عہدے دار شامل تھے۔

اپنے افتتاحیہ کلمات میں چئیرمین ایف بی آرنے ڈی این ایف بی پی سے منسلک فیٹیف شرائط پر روشنی ڈالی اور منی لانڈرنگ و دہشت گردی کی مالی معاونت کی روک تھام کے لئے ایف بی آر اور رئیل اسٹیٹ ایجنٹس کے مشترکہ اشتراک پر زور دیا۔

اس کے بعد سیشن میں بحث کا آغاز ہوا جس میں رئیل اسٹیٹ سیکٹر کے نمائیندگان نے ایف بی آر قواعد پر عمل درآمد میں درپیش مسائل سے متعلقہ سوالات پوچھے۔ اس موقع پر ڈی جی ڈی این ایف بی پی نے سوالات کے جوابات دیئے اور کہا کہ جلد ہی ایف بی آر مختصر گائیڈ لائینز اور کسٹمرز سے متعلقہ فارم کو اردو اور انگریزی زبان میں جاری کرے گا۔

سوالنامہ میں موجود سوالات کو ہر ممکن حد تک مختصر کیا جائے گا اور رئیل اسٹیٹ ایجنٹس کے لئے اردو زبان میں جاری کئے جائیں گے۔ ڈی جی ڈی این ایف بی پی نے مزید کہا کہ ایف بی آر ڈی این ایف بی پیزکی تعمیلی آسانی کے لئے ٹیمیں رئیل اسٹیٹ ایسوسی ایشنز بھیجے گا جو کہ سوالنامہ میں درکار معلومات کے اندراج کے لئے مدد فراہم کریں گی۔

ایف بی آر رئیل اسٹیٹ ایجنٹس سے رابطے کے ذریعے خوشگوار ماحول میں معائنے جاری رکھے گا۔ ایف بی آر رئیل اسٹیٹ ایسوسی ایشنز کی کمیٹی کے ساتھ مسائل کے حل کے لئے اشتراک جاری رکھے گا۔ ڈی جی ڈی این ایف بی پی نے اعجاز خان، سردار طاہر ، احسن ملک اور دیگر کے تعاون کا شکریہ ادا کیا اور امید ظاہر کی کہ ڈی این ایف بی پیز اینٹی منی لانڈرنگ اور دہشت گردی کی مالی معاونت کی روک تھام کے قوانین پر عمل درآمد جاری رکھیں گے۔