ممتاز حیدر
اسلام آباد: وفاقی وزیرِ خزانہ و محصولات، محمد اورنگزیب نے آج واشنگٹن ڈی سی میں ایس اینڈ پی گلوبل کی ٹیم سے ملاقات کی۔ اس ملاقات میں وزیرِ خزانہ نے پاکستان کی موجودہ معاشی صورتحال، مالیاتی استحکام کے اقدامات اور معیشت کے کلیدی محرکات پر تفصیل سے گفتگو کی۔
وزیرِ خزانہ نے اس بات کا خیرمقدم کیا کہ ایس اینڈ پی گلوبل کی ٹیم رواں ماہ کے آخر میں پاکستان کا دورہ کرے گی، جس کے دوران وہ ملک کی اقتصادی صورتحال کا جائزہ لے گی۔ انہوں نے وفد کو پاکستان کی معیشت کے مختلف پہلوؤں سے آگاہ کرتے ہوئے مالیاتی اصلاحات کے حوالے سے کیے جانے والے اقدامات پر روشنی ڈالی۔محمد اورنگزیب نے خاص طور پر فِچ ریٹنگز کی جانب سے پاکستان کی کریڈٹ ریٹنگ میں بہتری (B-) کا ذکر کیا، جسے حکومت کے ساختی اصلاحاتی ایجنڈے پر عالمی سطح پر اعتماد اور پاکستان کی معیشت میں سرمایہ کاروں کے بڑھتے ہوئے اعتماد کا واضح مظہر قرار دیا۔ وزیرِ خزانہ کا کہنا تھا کہ یہ بہتری پاکستان کے معاشی استحکام اور اصلاحات کے اقدامات کی کامیابی کا غماز ہے۔
انہوں نے مزید کہا کہ وہ اُمید کرتے ہیں کہ ایس اینڈ پی گلوبل بھی فِچ ریٹنگز کی طرز پر پاکستان کی کریڈٹ ریٹنگ میں بہتری لانے پر غور کرے گا، جس سے ملک کی معیشت کو عالمی سطح پر مزید فائدہ پہنچے گا۔
