ممتاز حیدر
پاکستانی سفارتخانے میں وزیر خزانہ محمد اورنگزیب نے عالمی مالیاتی اداروں، معروف امریکی کمپنیوں اور کارپوریٹ لیڈرز سے اہم ملاقاتیں کیں، جن میں پاکستان کی اقتصادی پالیسیوں، سرمایہ کاری کے مواقع اور نجی شعبے کے کردار پر تفصیلی بات چیت ہوئی۔
وزیر خزانہ محمد اورنگزیب نے ملک کی اقتصادی ترقی کو آگے بڑھانے میں نجی شعبے کے اہم کردار پر زور دیتے ہوئے کہا کہ آبادی میں اضافہ اور موسمیاتی تبدیلی جیسے بڑے چیلنجوں سے نمٹنے کے لیے نجی شعبے کے تعاون کی اشد ضرورت ہے،اس موقع پر امریکہ میں پاکستان کے سفیر رضوان سعید شیخ نے کہا کہ پاکستان 250 ملین کی بڑی مارکیٹ ہے اور وہ وسطی ایشیا، چین، مشرق وسطیٰ اور افریقی ممالک کے لیے گیٹ وے کا کردار ادا کر سکتا ہے۔ انہوں نے امریکی سرمایہ کاروں کو پاکستان کے آئی ٹی سیکٹر اور معدنیات میں سرمایہ کاری کی دعوت بھی دی۔
ملاقات میں معروف ٹیلی کام کمپنی جاز کے سی ای او عامر ابراہیم نے حکومت کی معاشی پالیسیوں اور ملکی معیشت کی استعداد پر بھرپور اعتماد کا اظہار کیا۔ اسی طرح امریکی کمپنی فلپ مورس نے پاکستان میں مزید سرمایہ کاری کا عندیہ دیا۔
ورلڈ بینک کے نائب صدر مارٹن ریزر نے بھی پاکستان کی معاشی استحکام سے متعلق حکومتی پالیسیوں کو سراہتے ہوئے مکمل اعتماد کا اظہار کیا۔ انہوں نے کہا کہ پاکستان کے لیے 40 ارب ڈالر کے دس سالہ پروگرام کا اعلان ورلڈ بینک کے پاکستان سے وابستگی کے عزم کی عکاسی کرتا ہے،آئی ایم ایف کے ایگزیکیٹو ڈائریکٹر بہادر بیجانی نے بھی حکومتی اصلاحاتی عمل اور اقتصادی پالیسیوں کو سراہا، اور عالمی اداروں کے اعتماد کی توثیق کی۔
