تعلیم کو کاروبار بنا لیا گیا ، جی سی یونیورسٹی نے پراسپیکٹس کی قیمت 500 سے بڑھا کر 2000 کردی ،

لاہور : خودمختاری کی آڑ میں تعلیمی اداروں نے تعلیم کو کاروبار بناتے ہوئے غریب طالبعلموں کے لیے تعلیم کا حصول مشکل بنا دیا ہے ، اطلاعات کے مطابق جی سی یونیورسٹی نے ایم فل اور ایم ایس کے طلباء کے پراسپیکٹس کی قیمت 500 روپے سے بڑھا کر 2000 روپے کر دی گئی۔

گورنمنٹ کالج یونیورسٹی نے طلباء کے داخلوں سے بھی منافع کمانا شروع کر دیا ایم فل میں داخلوں کے لیے یونیورسٹی انٹری ٹیسٹ کا ایک ہزار روپے پہلے ہی وصول کر چکی ہے۔ داخلوں کے لیے فارم جمع کرانے کی آخری تاریخ 4 ستمبر مقرر کی گئی ہے۔

جی سی یونیورسٹی ذرائع کے مطابق آن لائن فارم جمع کرانے والے امیدواروں سے پراسپیکٹس کی قیمت 2050 روپے وصول کی جائے گی۔ ایم فل کے مہنگے فارم خریدنے پر طلباء نے سخت رد عمل کا اظہار کیا ہے۔ طلباء کہتے ہیں کہ سرکاری یونیورسٹی ہونے کے باوجود نجی یونیورسٹی کی فیس وصول کی جا رہی ہے۔