fbpx

گھریلو جھگڑے پر گھر سے بھاگنے والی لڑکی کی لاش نالے سے برآمد

کراچی: گھریلو جھگڑے کے بعد گھر سے بھاگنے والی لڑکی کی لاش پیپری فلٹرپلانٹ کے نالے سے برآمد ہوگئی۔

کراچی کے علاقے ملیر کی رہائشی 17 سالہ شینا کے والد کے مطابق لڑکی 4 جنوری کی سہ پہر گھر سے ناراض ہوکر چلی گئی تھی اور اسی رات ایف آئی آر درج کرائی تھی۔ لاش کی شناخت لڑکی کے والد نے کپڑوں کی مدد سے کی ہے۔

پولیس کا کہنا ہے کہ لاش دو سے تین دن پرانی ہے اور کافی مسخ ہو چکی ہے۔ پولیس نے بتایا لاش پر بظاہر کوئی نشان نظر نہیں آرہا، تاہم موت کی وجہ پوسٹ مارٹم کے بعد ہی سامنے آئے گی۔

والد نے بتایا کہ لڑکی کا بہن بھائی سے جھگڑا ہوا تھا جس کے بعد وہ گھر سے ناراض ہوکر چلی گئی تھی، اس کے بعد شینا کو تلاش کیا گیا لیکن جب شام تک نہیں ملی تو گھر میں لڑکی کے سامان کی تلاشی لی گئی جس میں سے ایک موبائل فون برآمد ہوا جوکہ چھپا کر رکھا گیا تھا۔

یہ موبائل فون کسی نامعلوم لڑکے نے شینا کو دیا تھا اور اس پر ایک دوسرے موبائل سے کیے گئے میسیج بھی موجود تھے۔

پولیس کے مطابق مذکورہ موبائل پر میسج بھیجنے والے شخص کی تلاش شروع کر دی گئی ہے اور کیس کی مختلف زاویوں سے تفتیش کی جا رہی ہے۔

Facebook Notice for EU! You need to login to view and post FB Comments!