میرپورماتھیلو(باغی ٹی وی ،نامہ نگارمشتاق لغاری)گھوٹکی میں درندوں کو مات ہوگئی،ظالموں بے بھینس کی زبان کاٹ دی گئی، مقدمہ درج
تفصیل کے مطابق گھوٹکی کے نواحی علاقے سردار گڑھ میں درندگی کی انتہا کرتے ہوئے نامعلوم افراد نے ایک بے زبان بھینس کو بہیمانہ تشدد کا نشانہ بنایا اور اس کی زبان کاٹ دی۔ پولیس کے مطابق واقعے کی اطلاع ملتے ہی فوری کارروائی کا آغاز کردیا گیا ہے۔
مقامی ذرائع کے مطابق یہ افسوسناک واقعہ انسانی بے حسی اور سفاکیت کا کھلا ثبوت ہے، جس نے شہریوں کو شدید غم و غصے میں مبتلا کر دیا ہے۔ پولیس کا کہنا ہے کہ واقعے کا مقدمہ درج کر لیا گیا ہے اور ملوث افراد کی گرفتاری کے لیے مختلف مقامات پر چھاپے مارے جا رہے ہیں۔
پولیس حکام نے یقین دہانی کرائی ہے کہ جانوروں کے ساتھ اس قسم کے سلوک کو برداشت نہیں کیا جائے گا اور ملزمان کو جلد قانون کے کٹہرے میں لایا جائے گا۔ واقعے کی سنگینی کو دیکھتے ہوئے انسانی حقوق کے کارکنوں اور ویٹرنری ماہرین نے بھی سخت ردعمل دیا ہے۔
