گوجرہ: اسسٹنٹ کمشنر صدف اکبر کا رات گئے ہسپتال کا دورہ، مریضوں سے ملاقات

گوجرہ (باغی ٹی وی، نامہ نگار: عبد الرحمن جٹ)اسسٹنٹ کمشنر گوجرہ صدف اکبر نے چارج سنبھالتے ہی رات گئے گورنمنٹ ائی کام جنرل ہسپتال گوجرہ کا اچانک دورہ کیا، جہاں انہوں نے مختلف وارڈز، ایمرجنسی، لیبارٹری اور دیگر شعبہ جات کا تفصیلی معائنہ کیا۔

دورے کے دوران انہوں نے مریضوں سے براہ راست ملاقات کی اور ان سے فراہم کی جانے والی طبی سہولیات کے بارے میں معلومات حاصل کیں۔ صفائی ستھرائی کی صورتحال کا بغور جائزہ لینے کے بعد اسسٹنٹ کمشنر نے انتظامیہ کو ہدایات جاری کیں کہ صفائی کے انتظامات کو مزید بہتر بنایا جائے تاکہ مریضوں کو صاف ستھرا اور صحت افزا ماحول فراہم کیا جا سکے۔

اس موقع پر انہوں نے ہسپتال عملے کو ہدایت کی کہ وہ اپنے فرائض کو پوری ذمہ داری اور خلوص سے انجام دیں۔ صدف اکبر کا کہنا تھا کہ مریضوں کو معیاری طبی سہولیات اور صاف ستھرا ماحول فراہم کرنا ان کی اولین ترجیحات میں شامل ہے۔