ڈاکٹرغلام مصطفی بڈانی
گوجرہ ،باغی ٹی وی(نامہ نگار ، عبد الرحمن جٹ)جماعت اسلامی پاکستان کے امیر حافظ نعیم الرحمٰن کی کال پر گوجرہ میں فلسطینی مسلمانوں سے اظہارِ یکجہتی کیا گیا اور اسرائیلی دہشت گردی کے خلاف مکمل شٹر ڈاؤن رہا۔مختلف تنظیموں کے قائدین ریلیوں کی صورت میں چوک ملکانوالہ پہنچے، جہاں ایک احتجاجی جلسہ منعقد ہوا۔
جلسے سے خطاب کرتے ہوئے مقررین میں ضلعی صدر ڈاکٹر عطا اللہ حمید، ضلعی نائب امیر مولانا رحمت اللہ ارشد، مرکزی جمعیت اہلحدیث تحصیل گوجرہ کے سرپرستِ اعلیٰ مولانا عبدالقادر عثمان، مفتی افتخار الحسن، مرکزی انجمن تاجران کے صدر چوہدری منصور احمد بھنگو، جنرل سیکریٹری ملک امجد ضیاء، ٹریڈرز یونین کے سرپرست ڈاکٹر محمد ناصر چوہدری، انجمن کریانہ مرچنٹ ایسوسی ایشن کے صدر میاں عثمان زاہد، صرافہ ایسوسی ایشن کے صدر حاجی محمد اشرف محسن، حیدر علی چوہدری، محمود عزمی، اور مرکزی مسلم لیگ کے رہنما مولانا تاج محمد گجر اور ہمایوں منظور سمیت دیگر شامل تھے۔
مقررین نے اپنے خطاب میں کہا کہ یہود و نصاریٰ ہمیشہ سے مسلمانوں کے دشمن رہے ہیں۔ قبلہ اول مسجد اقصیٰ اور انبیاء کی سرزمین فلسطین، بالخصوص غزہ کے شہریوں پر اسرائیلی ریاست کے بدترین مظالم جاری ہیں، جس پر تمام مسلم حکمرانوں پر جہاد فرض ہو چکا ہے اور انہیں اپنی ذمہ داریاں پوری کرنی چاہئیں۔
انہوں نے کہا کہ پوری امتِ مسلمہ کا دینی و اخلاقی فرض ہے کہ وہ متحد ہو کر فلسطینی مسلمانوں کا ہر ممکن تعاون کرے۔
مقررین نے مزید کہا کہ گوجرہ کے شہریوں نے مکمل ہڑتال کرکے یہ ثابت کر دیا کہ ہم سب متحد ہیں اور مظلوم فلسطینی بھائیوں کے ساتھ کھڑے ہیں۔
انہوں نے کہا کہ اگر بھارت نے پاکستان کی طرف میلی آنکھ سے دیکھا تو اسے منہ توڑ جواب دیا جائے گا اور پوری پاکستانی قوم اپنی مسلح افواج کے شانہ بشانہ کھڑی ہے۔
آخر میں فلسطینی مسلمانوں، ملک کی سلامتی اور دینِ اسلام کی سربلندی کے لیے خصوصی دعا کی گئی۔
