fbpx

گورنر بلوچستان کا یوم دفاع کے موقع پر پیغام

کوئٹہ: گورنر بلوچستان کا یوم دفاع کے موقع پر پیغام جاری کیا ہے-

باغی ٹی وی : گورنر بلوچستان سید ظہور احمد آغا نے یوم دفاع پاکستان کے موقع پر اپنے ایک پیغام میں کہا ہے کہ برصغیر پاک و ہند کی تاریخ میں 6 ستمبر کا دن انتہائی اہمیت کا حامل ہے کیونکہ اس دن کو ہماری بہادر اور جرات مند مسلح افواج نے اپنے سے کئی گنا طاقتور دشمن کی جارحیت کا منہ توڑ جواب دےکر وطن عزیز کا پوری کامیابی سے دفاع کر کے یہ تاریخ رقم کی تھی۔

انہوں نے کہا کہ آج پاکستان ایک ایٹمی طاقت ہے اور پہلے کے مقابلے میں زیادہ طاقتور ہے. انہوں نے کہا کہ یہ وہی دن ہے جب ہماری مُٹھی بھر افواج نے جوان مردی، جرات اور بہادری کا عظیم الشان مظاہرہ کرتے ہوئے دشمن کے ناپاک ارادوں کو خاک میں ملا دیا اور مادر وطن کے دفاع کیلئے سیسہ پلائی دیوار بن گئیں۔

گورنر بلوچستان نے کہا کہ نہ صرف ہماری مسلح افواج بلکہ پوری قوم نے متحد ہو کر یہ ثابت کر دیا کہ اتحاد، اتفاق اور ایمان کی طاقت کے سامنے ہتھیاروں یا تعداد کی کثرت کوئی معنی نہیں رکھتی۔

گورنر ظہور احمد آغا نے اس بات پر زور دیا کہ آج کے دن ہمیں اس عہد کی تجدید کرنی چائیے کہ ہم اپنے عظیم شہداء کی قربانیوں کو رائیگاں نہیں جانے دیں گے اور اپنے پیارے وطن کے تحفظ، سالمیت اور دفاع کیلئے اسی جذبہ اور عزم کو ہمیشہ قائم رکھیں گے جس کا مظاہرہ پوری قوم نے 6 ستمبر 1965ء کی جنگ کے دوران کیا تھا۔ آج بھی ہر قسم کے خطرات سے نمٹنے کیلئے ہمارا عزائم مضبوط و مستحکم ہیں