پاکستان سے پولیوکے خاتمہ کے لیے تمام وسائل بروئے کارلائیں گے،ڈاکٹرظفرمرزا

اسلام آباد:پاکستان سے پولیوکے خاتمہ کے لیے تمام وسائل بروئے کارلائیں گے وزیر اعظم کے معاونِ خصوصی برائے صحت ڈاکٹر ظفر مرزا نے کہا ہے کہ انسداد پولیو مہم کے دوران ملک بھر کے 99 فیصد بچوں کو قطرے پلانے کا ہدف حاصل کر لیا۔

اُن کا کہنا تھا کہ رواں سال اب تک 111 پولیوکیس رپورٹ ہوئے جس کے بعد مہم کی اہمیت بڑھ گئی تھی، بلوچستان اور خیبرپختونخواہ کے اضلاع سے ابھی اعداد و شمار آنا باقی ہیں مگر ابھی تک سامنے آنے والے اعدادوشمار کےمطابق 39.1 ملین(99 فیصد) بچوں کو حفاظتی قطرےپلائےگئے۔مہم میں مجموعی طور پر 2 لاکھ 65 ہزار پولیو ورکرز نےحصہ لیا۔

ڈاکٹر ظفر مرزا کا کہنا تھا کہ کراچی،کوئٹہ،خیبر، پشین اور قلعہ عبداللہ میں پولیو مہم کل تک جاری ہے، حالیہ مہم کا آغاز وزیر اعظم نے بچوں کو انسداد پولیو کے قطرے پلا کر کیا تھا۔معاون خصوصی کا کہنا تھا کہ وزیراعظم کا اقدام پولیو کےخلاف قومی یکجہتی کی بڑی علامت ہے، تمام وزرائےاعلیٰ اور سیاسی جماعتوں نےمہم کی کامیابی میں اپنا اپنا کردار ادا کیا۔